Matur | mbl | 7.4.2025 | 12:30

Ómótstæðilega gott sítrónuspagettí með humri og burrata

Spagettí með humri og burrata sem getur ekki klikkað. Undursamlegt að njóta. Ljósmynd/Berglind Hreiðars

Berglind Hreiðars hjá Gotterí og gersemar hefur mikið dálæti af burrataostinum og reyndar öll fjölskyldan. Hún töfraði fram þennan dásamlega spagettírétt á dögunum fyrir uppskriftavefinn Gott í matinn þar sem burrataosturinn er í forgrunni og leikur við bragðlaukana ásamt humri. Sítrónusmjörið bráðnar í munni og minnir á vorið.

Fullkominn réttur til að njóta í páskafríinu með fjölskyldunni.

Sítrónuspagettí með humri og burrata

Fyrir 4

300 g litlir tómatar
400 g spagettí eða linguine pasta
500 g skelflettur humar
1 stk. sítróna (skorin í þunnar sneiðar)
4 stk. hvítlauksgeirar
smjör til steikingar
ólífuolía eftir smekk
salt og pipar eftir smekk

Toppur

ferskt basilpestó (grænt pestó), eftir smekk
ristaðar furuhnetur, eftir smekk
söxuð basilíka, eftir smekk
4 stk. litlar burrata kúlur (við stofuhita)

Meðlæti

Hvítlauksbrauð eða annað brauð sem heillar

Aðferð:

Hitið ofninn í 200°C.
Setjið tómatana í eldfast mót, hellið um 2 msk. af ólífuolíu yfir, rífið 2 hvítlauksrif saman við, saltið og piprið.
Bakið í ofninum í 20 mínútur á meðan þið undirbúið annað.
Sjóðið spagettíið í söltu vatni.
Smjörsteikið humarinn á meðan og rífið 2 hvítlauksrif yfir hann í lokin, saltið og piprið.
Takið humarinn af pönnunni, bætið á hana smjöri (um 2 msk.), ólífuolíu (um 2 msk.) og sítrónusneiðum, leyfið að malla við meðalhita þar til sneiðarnar mýkjast upp.
Bætið spagettínu saman við sítrónusmjörið og veltið upp úr því, fjarlægið svo sítrónusneiðarnar sjálfar.
Raðið síðan saman á disk; spagettí, bökuðum tómötum, smjörsteiktum humri, pestó, furuhnetum, basilíku og síðast en ekki síst lítilli burrata kúlu.
Njótið sem fyrst með góðu hvítlauksbrauði eða öðru brauði sem heillar.