Matur | mbl | 7.5.2025 | 21:00

Aðalsjónvarpsrétturinn í dag með mexíkósku ívafi

Ótrúlega djúsí réttur með mexíkósku ívafi. Ljósmynd/Berglind Hreiðars

Berglind Hreiðars hjá Gotterí og gersemar töfraði fram þennan einfalda, fljótlega og góða rétt með mexíkósku ívafi sem fullkomið er að bjóða upp á fyrir helgina. Þetta er ekta stemningsréttur sem er líka að upplagt að bjóða upp á meðan horft er á keppnisleiki á skjánum og getur líka steinlegið þegar Eurovison-gleðin hefst í sjónvarpinu.

Til að gera réttinn matmeiri er trixið að setja franskar kartöflur undir og bbq-sósan gerir þennan einstaklega djúsí. Það er líka hægt að vera með venjulegar franskar ef vill. Hver og einn getur leikið sér með hráefnið eftir sínu nefi.

BBQ-nachos í ofni

Fyrir 4

450 g sætkartöflufranskar
450 g eldaður kjúklingur
200 g Heinz Sweet BBQ sósa
Nachos flögur
½ rauðlaukur
4 msk. svartbaunir
4 msk. gular baunir
Smá jalapeno úr krukku
Rifinn ostur
Límóna og kóríander yfir í lokin

Aðferð:

Hitið ofninn í 210°C.
Dreifið úr frönskunum (ég notaði einn poka af frosnum sætkartöflufrönskum) á ofnskúffu/eldfast mót, bakið í um 18 mínútur og undirbúið annað á meðan.
Skerið niður kjúklinginn, ég notaði eldað kjúklingalærakjöt en það má nota hvað sem er. Blandið honum saman við bbq sósuna.
Skerið laukinn í strimla og undirbúið annað hráefni.
Takið franskarnar út, bætið nachosflögum yfir, síðan kjúklingi og osti yfir og því næst rauðlauk, baunum, jalapeno og meiri rifnum osti.
Bakið áfram í um 12 mínútur og toppið með liímónubátum og kóríander.
Berið fram og njótið.