Matur | mbl | 10.5.2025 | 12:30

Ljúffeng skúffukaka sem yljar sálinni

Þessi skúffukaka lítur ómótstæðilega vel út og tilvalið að baka hana með helgarkaffinu. Ljósmynd/Helena Gunnarsdóttir

Er ekki upplagt að baka ljúffenga skúffuköku með helgarkaffinu? Þegar okkur langar að fá góða gesti heim í kaffi þá er lag að gleðja þá með skúffuköku sem hlýjar sálinni.

Þessi skúffukaka er góð fyrir sálina, með smá kanilbragði og örlitlum kaffikeim. Galdurinn við mýktina í kökunni er Óskajógúrtið með hnetu- og karamellubragði. Uppskriftin er einmitt góð fyrir rigningar- og haglélsdaga að vori og sumri og kemur úr smiðju Helenu Gunnarsdóttur, matarbloggara hjá Eldhúsperlum. Uppskriftina gerði hún fyrir uppskriftavefinn Gott í matinn.

Skúffukakan

5 dl hveiti
4 dl sykur
1 tsk. kanill
2 msk.kakó
1⁄2 tsk.salt
1 tsk. matarsódi
1 tsk. lyftiduft
2 dósirÓskajógúrt með hnetu- og karamellubragði
2 stk. egg
2 dl mjólk
2 tsk. vanilluextrakt
150 g smjör, brætt

Á milli

3 msk.sykur
2 tsk.kanill

Aðferð:

Hitið ofn í 170°C með blæstri.
Hrærið öllum þurrefnum saman í skál.
Pískið saman jógúrt, eggjum, mjólk og vanillu og hellið út í deigið.
Bætið að lokum bræddu smjöri saman við og blandið vel saman.
Hellið helmingnum af deiginu í skúffukökuform, stráið kanilsykrinum á milli og breiðið svo restina af deiginu yfir.
Bakið í um það bil 25-30 mínútur eða þar til bakað í gegn.

Kaffikrem

250 g flórsykur
2 msk.kakó
75 g smjör, brætt
4 1⁄2 msk. heitt sterkt kaffi
1 tsk. vanilluextrakt
smá klípa sjávarsalt

Aðferð:

Gerið kremið meðan kakan er í ofninum.
Pískið öllum hráefnum saman og bætið heitu kaffi smám saman út í þar til kremið er passlega þykkt.
Hellið kreminu yfir heita kökuna og látið standa í 15 mínútur áður en hún er borin fram.