Matur | mbl | 11.5.2025 | 16:00

Gómsæt marensterta sem lætur þig kikna í hnjánum

Þessi marensterta á eftir að slá í gegn. Hún bæði undurljúffeng og falleg á borðið. Ljósmynd/Berglind Hreiðars

Ef þig langar til að gera alvöru marensbombu sem tryllir lýðinn þá verður þú að prófa þessa. Berglind Hreiðars hjá Gotterí og gersemar gerði þessa um daginn en hún elskar Nóa Kropp og sérstaklega þetta nýja. Þegar þessi marensterta var borin fram á borð á hennar heimili hvarf hún hreinlega ofan í heimilisfólkið á augabragði.

Það má stundum leyfa sér og þegar það er að koma að Eurovison er lag að bjóða upp á svona dýrðlegar tertur eins og þessa. Þessi er undurljúffeng og falleg og lætur þig kikna í hjánum.

Nói Kroppið er syndsamlega gott með þessari marenstertu. Ljósmynd/Berglind Hreiiðars

Rice Krispies marensterta með Nóakroppi

4 eggjahvítur
220 g sykur
60 g Rice Krispies
50 g Síríus suðusúkkulaði með karamellu og salti – saxað

Aðferð:

Hitið ofninn í 140°C og teiknið 2 x um 20 cm hringi á sinn hvorn bökunarpappírinn í ofnskúffu.
Þeytið eggjahvítur og sykur saman á meðalhraða þar til topparnir halda sér og sykurinn er uppleystur.
Vefjið þá Rice Krispies og söxuðu súkkulaðinu saman við með sleikju og skiptið niður í tvo hluta á bökunarpappírana.
Dreifið úr og mótið hringi, bakið í 60 mínútur og leyfið síðan að kólna niður með ofninum áður en þið fyllið.

Fylling og skreyting

600 ml þeyttur rjómi
100 g jarðarber (stöppuð)
250 g Nóakropp með karamellukurli og sjávarsalti
50 g Síríus suðusúkkulaði með karamellu og salti – brætt

Aðferð:

Blandið þeyttum rjóma, stöppuðum jarðarberjum og helmingnum af Nóakroppinu varlega saman með sleikju.
Setjið helminginn á milli botnanna og hinn helminginn ofan á seinni botninn.
Toppið með restinni af Nóakroppinu og bræddu suðusúkkulaðinu.