Matur | mbl | 14.5.2025 | 21:00

Kryddsósan hans Rúnars eru töfrar fyrir bragðlaukana að njóta

Rúnar Gíslason er meistari í grillsósugerð og ómetanlegt að komast í uppskriftirnar hans fyrir grillsumarið. mbl.is/Eggert Jóhannesson

Rúnar Gíslason matreiðslumeistari, eigandi Spírunnar og veisluþjónustunnar Kokkanna, er meistari í því að gera kaldar og bragðgóðar grillsósur sem passa nánast með öllum grillmat.

Ein af sósunum hans sem hafa slegið í gegn í grillveislunum sem hann hefur slegið upp er þessi ljúffenga kryddsósa sem töfrar bragðlaukana upp úr skónum og nær þessu fimmta bragði, umami-bragðinu. Bragðsamsetningin er svo dásamleg.

„Þessa sósu eða aðferð nota ég þegar ég er að taka til í kælinum hjá mér. Maður þarf samt að passa sig hvað maður setur en þessi innihaldsefni passa vel saman,“ segir Rúnar.

Kryddsósan hans Rúnars Gíslasonar er ómótstæðilega góð og bragðbomba að njóta í munni. mbl.is/Eggert Jóhannesson

Kryddsósan

3 stk. skallot-laukar
1 þumall engifer
2 stk. sæt paprika
2 stk. hvítlauksrif
2 stk. sveppir
1 stk. gulrót
2 stk. chili
30 g blaðlaukur
½ stjörnuanís
1 lárviðarlauf
1 dl. balsamik edik
4 dl vatn
1 dl ólífuolía
Sjávarsalt eftir smekk

Aðferð:

Byrjið á því að hita ofninn í 160°C hita.
Snyrtið allt grænmeti og grófskerið.
Setjið í ofnskúffu ásamt stjörnuanis og lárviðarlaufi og setjið smá af ólífuolíu og sjávarsalti.
Bakið í ofni við 160°C í 25 mínútur.
Setjið allt úr ofnskúffunni í vitamix eða matvinnsluvél.
Setjið balsamikedikið og vatnið með og vinnið í eina til tvær mínútur eða þangað til blandan er silkimjúk.
Það má setja meira vatn ef ykkur finnst blandan of þykk.
Að lokum er ólífuolían sett út í og saltað eftir smekk.
Setjið vélina aftur í gang í svona 30 sekúndur.
Hellið síðan sósunni í viðeigandi skál eða ílát ef þið ætlið að geyma í kæli fyrir notkun.
Berið fram með því sem hugurinn girnist.