Matur | mbl | 22.5.2025 | 6:30

„Fann hjá mér þörf fyrir að opna mig fyrir einhverju nýju“

Stefanía Malen futti til Kaupmannahafnar í Damörku og hóf nýjan kafla í lífi sínu. Hún starfar sem yfirbakari í bakaríinu Bake My Day. Ljósmynd/Aðsend

Stefania Malen bakarameistari flutti til Kaupmannahafnar í Damörku fyrir liðlega ári síðan og hóf nýjan kafla í lífi sínu. Þessa dagana blómstrar hún í faginu og nýtur þess að baka danskar kræsingar. Hún gefur lesendum Matarvefsins uppskrift að klassískri danskri rabarbaraköku sem á vel á þessum árstíma.

Klassísk dönsk rabarbarakaka sem gleður í sólinni. Ljósmynd/Stefanía Malen

„Ég lauk sveinsprófi í bakstri árið 2022 og útskrifaðist sem bakarameistari árið 2024. Sama ár fékk ég þann heiður að verða hluti af íslenska bakaralandsliðinu og keppa á heimsmeistaramóti ungra bakara. Það var algjör draumur og ævintýri sem ég mun aldrei gleyma.

Ákvað að stíga út fyrir þægindarammann

Eftir þessa dýrmætu reynslu ákvað ég að stíga út fyrir þægindarammann og flytja til Danmerkur. Í lok september 2024 flutti ég til Kaupmannahafnar og hóf nýjan kafla í mínu lífi,“ segir Stefanía og brosir sínu fallega brosi.

Í dag starfar hún sem yfirbakari hjá Bake My Day. Bakaríið er staðsett á Amager í Kaupmannahöfn, með verslanir bæði í Amager og í mollinu Fisketorvet.

„Mér líður mjög vel þar, það er bæði gaman og gefandi að vinna í þessu umhverfi. Í Bake My Day er ótrúlega skemmtilegt að starfa. Ég fæ að gera það sem ég elska, að baka og svo er það ekki síður yndislegt að vinna með æðislega skemmtilegu fólki,“ segir hún og brosir allan hringinn.

„Eftir að hafa elt drauminn minn á Íslandi fann ég hjá mér þörf fyrir að opna mig fyrir einhverju nýju, að prófa mig áfram utan örugga rammans, að flytja út og sjá hvert lífið gæti leitt mig. Það var bæði spennandi og óvíst, en stundum þarf maður einmitt að opna sig, treysta innsæinu og leyfa sér að stíga út í óvissuna.

Því það er einmitt þar, utan við það sem maður þekkir, sem stærstu draumarnir geta ræst og maður fær tækifæri til að vaxa, bæði sem fagmanneskja og manneskja.“

Fátt betra en að njóta góðrar rabarbaraköku

Stefanía deilir hér með lesendum uppskrift að rabarbaraköku sem Danir eru sérstaklega hrifnir af. „Ég ákvað að búa til þessa köku vegna þess að sumarið er að nálgast, og mér finnst fátt betra en að njóta góðrar rabarbaraköku á hlýjum og björtum sumardegi,“ segir Stefanía að lokum og heldur út í sólina með bros á vör.

Þessi er girnileg. Ljósmynd/Stefanía Malen

Klassísk dönsk rabarbarakaka

Deigið:

250 g rabarbari
200 g sykur
125 g smjör (við stofuhita)
2 stk. egg
200 g hveiti
2 tsk. lyftiduft
1 tsk. vanilludropar
100 ml mjólk

Aðferð:

Hitið ofninn í 180°C.
Smyrjið 24 cm hringlaga kökuform og klæðið botninn með smjörpappír.
Undirbúið rabarbarann. Stefanía notaði ferskan rabarbara, en það er líka í lagi að nota frosinn.
Skerið hann í 1–2 cm bita og stráið 2 msk. af sykri yfir.
Blandið létt saman og leggið til hliðar.
Þetta mýkir ferskan rabarbara og dregur smávegis safann úr honum, sem hjálpar honum að bakast betur í kökunni. Þessu skrefi má sleppa ef notaður er frosinn rabarbari.
Þeytið saman smjör og sykur þar til blandan verður létt og ljós.
Bætið eggjunum út í, einu í einu, og hrærið vel á milli.
Blandið þurrefnunum saman og bætið þeim smám saman út í deigið, til skiptist
með mjólkinni og vanilludropunum.
Hrærið þar til deigið er slétt og vel blandað.
Hellið deiginu í kökuformið og dreifið rabarbaranum jafnt yfir.
Dreifið síðan crumble-mylsnu yfir (sjá uppskrift fyrir neðan).
Bakið í 45–55 mínútur, eða þar til toppurinn er gullinbrúnn og hnífur kemur hreinn út þegar honum er stungið í miðjuna.
Látið kökuna kólna aðeins áður en hún er tekin úr forminu.
Berið fram volga með ísköldum vanilluís eða þeyttum rjóma.

„Crumble“ (mylsna á toppinn)

75 g smjör (kalt)
75 ghveiti
50 g haframjöl
75 g púðursykur
klípa af kanil, ef vill

Aðferð:

Setjið saman kalt smjör, hveiti, púðursykur, haframjöl og (ef vill) klípu af kanil.
Nuddið saman með fingrunum þar til blandan minnir á grófa mylsnu.
Dreifið mylsnunni yfir rabarbarann þannig að hún þeki kökuna vel.