Matur | mbl | 9.6.2025 | 16:30

Verður þetta sumarlegasta pítsan í ár?

Þessi er svo girnileg og gæti orðið sú sumarlegasta í ár. Ljósmynd/Helena Gunnarsdóttir

Þessi pítsa er svo bragðgóð og fljótleg að gera, osturinn og meðlætið er hreint sælgæti að njóta. Hún á eftir að hitta beint í mark og er fullkomin til að bjóða upp á í næsta vinahitting.

Heiðurinn af þessari gleðipítsu á Helena Gunnarsdóttir hjá Eldhúsperlum. Það sem gerir þessa pítsu líka svo góða er mynta og chili-ið, það passar mjög vel með grillostinum. Síðan er hún toppuð með örlitlu hunangi og útkoman verður stórfengleg fyrir bragðlaukana.

Það er æðislegt að bera pítsuna fram í góðra vina hópi og vera að bjóða upp á kaldar búbblur eða aðra góða drykki með.

Sumarpítsa með grillosti

Fyrir 2

2 stk. tilbúið pítsadeig, litlar kúlur
1 stk. grill- og pönnuostur frá Gott í matinn
1 dl söxuð fersk mynta
1 stk. rauður chili
4 msk.ólífuolía
safi úr hálfri sítrónu
salt og pipar eftir smekk
klettasalat eftir smekk
tómatar eftir smekk
ristaðar furuhnetur eftir smekk

Aðferð:

Fletjið pítsadeigið út og grillið eða bakið þar til eldað í gegn.
Grillið grillostinn við háan hita á báðum hliðum þannig að það komi fallegar grillrendur. Standið yfir ostinum og gætið þess að grilla hann ekki of lengi.
Gott er að nota spaða til að snúa honum á grillinu.
Hrærið saman saxaðri myntu, chillipipar (án fræja ef þið viljið ekki of sterkt), ólífuolíu og sítrónu.
Smakkið til með salti og pipar.
Smyrjið smá af kryddjurtaolíunni á bakaðan pítsabotninn.
Dreifið þá klettasalati og tómötum yfir.
Raðið grillostasneiðunum yfir.
Toppið með meiri kryddolíu, furuhnetum, sjávarsalti og örlitlu hunangi og berið fram strax.