Matur | mbl | 23.6.2025 | 6:30 | Uppfært 7:34

„Smakkaði nautasteik í fyrsta skiptið á Costa del Sol“

Írena Björk Gestsdóttir á heiðurinn af vikumatseðlinum að þessu sinni. mbl.is/Karítas

Írena Björk Gestsdóttir á heiðurinn af vikumatseðlinum sem er einstaklega gómsætur að þessu sinni. Hún starfar sem viðskiptastjóri hjá VAXA og er innan um ferskt salat og kryddjurtir nánast alla daga. Góður matur er eitthvað sem hefur ávallt fylgt henni og ekki finnst Írenu verra að vera innan um ferskar matjurtir í vinnunni.

„Fyrir þá sem ekki vita þá er VAXA fyrirtæki sem ræktar matjurtir í lóðréttum landbúnaði á mörgum hæðum með LED-ljósi og er nýting á landi, orku og vatni þannig hámörkuð. Þannig er grænmetið okkar ræktað í hæsta gæðaflokki á sjálfbæran og umhverfisvænan hátt allt árið um kring. Algjör snilld,“ segir Írena og brosir.

Hefur verið í fótbolta frá því hún man eftir sér

Írena flutti fyrst í Reykjavík þegar hún var í námi við Háskólann í Reykjavík, en þaðan er hún útskrifuð úr bæði viðskiptafræði með lögfræði sem aukagrein og lögfræði með viðskiptafræði sem aukagrein. Einnig er hún viðurkenndur stafrænn markaðssérfræðingur.

„Ég er úr Þorlákshöfn og elskaði að alast þar upp en bý núna í höfuðborginni með Ingimari kærastanum mínum. Fjölskylda mín er þó ennþá öll í Þorlákshöfn svo ég er alltaf með annan fótinn þar og er meðal annars formaður Íþrótta- og tómstundanefndar þar sem er einmitt mjög mikið af spennandi hlutum í gangi í augnablikinu.“

„Ég hef verið í fótbolta frá því ég man eftir mér og spila núna með Selfossi en ég er þar á láni frá Fram. Áhugasviðið er því ansi fjölbreytt og líður mér best þegar það er mjög mikið að gera.

Matur hefur ávallt skipt máli í lífi Írenu. „Ég hef alltaf verið mikill matgæðingur, alveg frá því ég var 7 ára gömul og smakkaði nautasteik í fyrsta skipti á Costa del Sol. Þá var ekki aftur snúið. Það var alltaf kvöldmatur heima í Þorlákshöfn, alveg sama hversu upptekin mamma var svo fjölskyldan settist alltaf saman og borðaði kvöldmat og mér finnst það virkilega dýrmætt.

Frá því að ég flutti að heiman hef ég haldið þessum sið og við Ingimar erum mjög dugleg að elda saman þó að við borðum yfirleitt mjög seint þar sem við erum iðulega að koma seint heim af fótboltaæfingu. Það er svo heppilegt að hann er einnig mikill matgæðingur svo við erum dugleg að prófa eitthvað nýtt og þróa uppskriftir áfram.

Svo að sjálfsögðu er ávallt eitthvað grænt með frá VAXA enda gerir það allan mat betri,“ segir Írena glöð í bragði.

„Það er því virkilega gaman að fá að vera með vikumatseðilinn að þessu sinni, enda er hann einstaklega gómsætur þó að ég segi sjálf frá.“

Mánudagur – Tagliatelle með hvítlauks- og parmesansósu

„Ég er mikil pasta-manneskja svo það er fullkomið að byrja vikuna á gómsætu tagliatelle með VAXA-sprettum að sjálfsögðu, þær eru punkturinn yfir i-ið.“