„Stórasta“ kokteilahátíð Íslands, eins og skipuleggjendum finnst gaman að kalla hana, öðru nafni Stykkishólmur Cocktail Week, lauk um helgina og tókst með eindæmum vel. Hátíðin var haldin af veitingahúsum og börum í Stykkishólmi ásamt Barþjónaklúbbi Íslands í samstarfi við Mekka Wines & Spirits að því fram kemur í tilkynningu frá klúbbnum.

Sérútbúnir kokteilaseðlar

Mikil gleði ríkti í einum fallegasta bæ landsins, Stykkishólmi, á meðan gestir og gangandi fögnuðu og skáluðu kokteilum. Staðirnir sem tóku þátt í SCW í ár voru Narfeyrarstofa, Hótel Egilsen, Sjávarpakkhúsið, Skipper og Fosshótel Stykkishólmur. Allir þessir staðir buðu upp á sérútbúinn kokteilaseðil sem enn er hægt að gæða sér á. 

Íslensk sumarnótt

Hápunktur hátíðarinnar átti sér stað síðastliðinn sunnudag á Fosshóteli Stykkishólms þar sem keppt var í tveimur flokkum í kokteilum; annars vegar vinnustaðakeppnin um Stykkishólmur Cocktail Week kokteil ársins, þar sem þátttökustaðir SCW kepptu sín á milli og hins vegar Stykkishólmur Cocktail Week Open - Hanastél í Hólminum.

Hér var um að ræða einstaklingskeppni og opin fyrir alla barþjóna og kokteilaáhugafólk, en það er í fyrsta skipti sem hún er haldin. Þemað var íslensk náttúra.

Hólmarinn Thelma Lind Hinriksdóttir frá Narfeyrarstofu kom, sá og sigraði SCW Open - Hanastél keppnina sem var haldin í Stykkishólmi í síðustu viku. Hún sigraði keppnina með kokteilnum sínum sem ber heitið „Íslensk sumarnótt.“

Thelma er mörgum hæfileikum gædd en hún er bæði bóndi og barþjónn og fer leikandi létt að vera með marga bolta á lofti í einu. Hún heillaði dómnefndina upp úr skónum með kokteilnum sínum og fasi.

Hótel Egilsen sigraði vinnustaðakeppnina og eru því með SCW kokteil ársins í boði hjá sér á seðli. Kokteillinn ber heitið „Welcome to the Jungle''. Það var Chris sem sýndi listir sínar og hristi kokteilinn fyrir dómnefndina fyrir hönd Egilsen.

Í öðru sæti var Jón Helgi Guðmundsson á Óbarnum með kokteilinn Wabbit Season og Adam Kiss á Fosshótel Stykkishólmi tók þriðju sætið með kokteilnum Surreal Gimlet.