Mikil gleði hjá gestum í gróðurhúsinu

Laufey Sif Lárusdóttir og Elvar Þrastarson eiga og reka Ölverk í Hveragerði. Elvar ber ábyrgð á pop up-matseðli sem verður í boði á hátíðinni. Ljósmynd/Dagný Dögg Steinþórsdóttir

Laufey segir að hátíðin hafi stækkað að umfangi síðan hún var fyrst haldin árið 2019. Gestafjöldinn er nú í kringum 300 en framleiðendum og innflytjendum sem kynna vörur sínar hefur fjölgað umtalsvert. Í ár verða yfir 20 íslensk brugghús á hátíðinni auk nokkurra erlendra og ýmissa annarra framleiðenda. Þar á meðal er íslenskt kombucha, ís frá Kjörís þar sem bjór er notaður í framleiðsluna og ostur frá MS sem bæði er látinn liggja í bjór og eldpiparsósum sem Ölverk framleiðir. „Þetta er mikil tilraunastarfsemi, mjög spennandi og passar vel með bjórunum á hátíðinni,“ segir Laufey.

Hátíðin virkar þannig að fólk kaupir sér passa, annaðhvort fyrir bæði kvöldin eða annað hvort þeirra. Á föstudeginum gefa framleiðendur smakk á vörum sínum frá klukkan 17-20 og á laugardeginum er það frá 16-20.

Hægt að smakka yfir 120 tegundir

„Það eru yfir 60 tegundir hvorn daginn. Það eru væntanlega bara þeir hörðustu sem ná að smakka allt. Þeir sem ná því eru algerlega á eigin ábyrgð í því ferðalagi,“ segir Laufey og hlær.

Eftir að smakkinu lýkur tekur við tónlistarveisla þar sem boðið er upp á rjómann af því skemmtilegasta í dag, að sögn Laufeyjar.

Á föstudeginum mætir Herra Hnetusmjör á svæðið og þegar hann hefur lokið sér af þeyta meðlimir FM Belfast skífum. Á laugardeginum mæta Þórunn Antonía og Berndsen og að því búnu tekur plötusnúðurinn Andri Freyr við.

„Þetta fer allt fram í eldgömlum heitum gróðurhúsum fyrir aftan veitingastaðinn Ölverk í Hveragerði. Það er auðvitað allra veðra von í október en við bara hækkum hitann. Í upphafi lak svolítið inn í gróðurhúsin og það var oft meira vatn en bjór í glösunum. Nú er búið að skipta um allar rúður og þetta er vatnshelt. Þarna inni er alltaf heitt og gott,“ segir Laufey.

Hún segir að mikil stemning sé jafnan á hátíðinni. Blómaskreytar séu fengnir til að skreyta gróðurhúsið, margir mæti í búningum og þau setji upp sérstaka glimmerstöð.

Auk þess er seldur matur á svæðinu af pop-up matseðli frá Ölverki. Á matseðlinum verða meðal annars pretzel með heimagerðri obatzda-dýfu, bratwurst með Ölverks-bjórsinnepi eða currywurst-sósu, samlokufjör í focaccia, síam sem er pad kra Pao naut og gráðostur, jammin sem er jerk-kjúklingur og strákasalat, yamas sem er vegan gyros og pítusósa.

Einfalt að taka strætó

Laufey segir að heimamenn mæti alltaf á hátíðina auk fólks úr næstu sveitarfélögum. „Og fólk úr Reykjavík sem er búið að fatta hvað þetta er skemmtilegt. Það er alls konar gisting í boði hérna en svo er líka einfalt að taka strætó. Þetta er búið snemma og fólk getur því komist heim enda er aðeins hálftími á milli.“

Mikil stemning myndast jafnan á meðal bruggaranna á staðnum. „Þetta er hálfgerð uppskeruhátíð brugghúsanna. Það eru allir á kafi yfir sumarið en þarna getum við skemmt okkur saman.“