Matur | Veitingastaðir | mbl | 15.10.2025 | 11:30 | Uppfært 11:49

Þorgerður Katrín skar fyrstu sneiðina með sendiherra Þýskalands og Pawel

Clarissa Duvigneau sendiherra Þýskalands á Íslandi ásamt Þorgerði Katrínu Gunnarsdóttur utanríkisráðherra og Pawel Bartoszek þingmanni Viðreisnar og formanni utanríkismálanefndar skera fyrstu tertusneiðina. Ljósmynd/Aðsend

Þýski sendiherrann stóð fyrir þjóðhátíðardagsmóttöku í Bryggjuhúsinu við Vesturgötu 2 í miðbæ borgarinnar á dögunum, en þann 3. október síðastliðinn fagnaði Þýskaland 35 ára afmæli sameiningar landsins.

Í tilefni þess hélt þýska sendiráðið á Íslandi glæsilega móttöku sem fram fór í sögulegu umhverfi Bryggjuhússins við gömlu höfnina í Reykjavík. Viðburðurinn var í boði Clarissu Duvigneau, sendiherra Þýskalands á Íslandi. Fjölmargir gestir mættu til að samfagna þessum áfanga, þar á meðal Þorgerður Katrín Gunnarsdóttir utanríkisráðherra Íslands, og Pawel Bartoszek, þingmaður Viðreisnar og formaður utanríkismálanefndar Alþingis.

Ekta þýsk Svartaskógarterta, eða Schwarzwälder Kirschtorte, sem Sigurður Már Guðjónsson bakarameistari og kökugerðarmaður hjá Bernhöftsbakaríi bakaði og skreytti. Ljósmynd/Aðsend

Sögulegt hús og táknræn staðsetning

Bjart og hlýtt veður setti fallegan svip á kvöldið og skapaði notalega stemningu í Bryggjuhúsinu, þar sem gestir nutu lifandi tónlistar. Sendiherrann rifjaði upp að húsið sem móttakan fór fram í, Bryggjuhúsið, væri eitt það elsta í Reykjavík og að þar hefði áður staðið höfnin sjálf.

Frétt af mbl.is

„Þeir hafa farið langt fram úr okkar villtustu væntingum“

„Gólfið sem ég stend á er sögulegt – hér voru áður mældar allar vegalengdir til og frá Reykjavík. Þetta hús hefur verið vitni að öllum helstu viðburðum í sögu Íslands frá 19. öld,“ sagði hún.

Í ræðu sinni minntist sendiherrann þess að 36 ár væru liðin frá falli Berlínarmúrsins og 35 ár frá endursameiningu Þýskalands.

„Við fögnum þeim sem þorðu að rísa upp fyrir frelsi sitt – í Póllandi, Ungverjalandi, Þýskalandi og víðar austan múrsins,“ sagði hún og bætti við: „Við njótum ávaxta þeirra baráttu. Nú er komið að okkur að standa vörð um þau gildi sem þau börðust fyrir.“

Þýsk menning og matarhefð í hávegum höfð

Sendiráðið ákvað í fyrsta sinn að tileinka móttökuna þekktasta sambandslandi Þýskalands, Bæjaralandi, og skapa skemmtilega og óformlega stemningu í anda Oktoberfest.

„Ég er svo glöð að sjá marga í Dirndl og Lederhosen – þið eruð stórkostleg!“ sagði sendiherrann hlæjandi.

Gestum var boðið upp á alvöru þýska rétti í „Reykjavíkurútgáfu“: súrkál, pylsur, Haxn, Leberkäs, Spätzle með osti – og auðvitað beyglur og Schwarzwälder Kirschtorte.

Einnig var boðið upp á úrval þýskra rétta og drykkja – bratwurst, þýska osta, bjór og brezel – og að sjálfsögðu ekta þýska Svartaskógartertu, eða Schwarzwälder Kirschtorte, sem Sigurður Már hjá Bernhöftsbakaríi í Reykjavík bakaði.

Þau voru glaðbeitt með tertuhnífinn. Ljósmynd/Aðsend

Þakkaði bakarameistaranum fyrir þýsku tertuna

Sendiherrann flutti þakkir íslenskra tónlistarmanna og annarra listamanna fyrir þeirra framlag og færði sérstakt þakklæti til Sigurðar Más Guðjónssonar, bakara- og kökugerðarmeistara hjá Bernhöftsbakaríi, sem bjó til öll brezelin og skreytti veisluna með glæsilegri Schwarzwälder-tertu.

Frétt af mbl.is

„Bakaraiðn lifandi og skapandi grein“

Sendiherrann, Þorgerður Katrín og Pawel sáu um skurðinn á tertunni við mikinn fögnuð viðstaddra.

„Sigurður Már lærði hluta af faginu sínu í Þýskalandi og rekur elsta starfandi fyrirtæki á Íslandi, Bernhöftsbakarí frá árinu 1834. Við erum honum afar þakklát fyrir framlagið,“ sagði hún og skálaði fyrir vináttu Íslands og Þýskalands.

Myndirnar tala sínu máli og fanga stemninguna sem var í loftinu.