Hér var á ferðinni einstakur matarviðburður þegar Michelin-kokkurinn Þráinn Freyr Vigfússon galdraði fram listræna og fallega rétti á fyrsta vetrardegi, á meðan snjókorn féllu hljóðlega að ofan í kyrrðinni.

Að vera á hálendinu, þar sem íslensk náttúra skartar sínu fegursta og vetur konungur lætur að sér kveða, á sama tíma og Þráinn og teymi hans bera fram margréttaseðil með skírskotun í íslenskt hráefni, er ólýsanleg upplifun.

Þetta var án efa ein ævintýralegasta matarupplifun sem ég hef notið. Umhverfið átti stóran þátt í því að gera kvöldið svona einstakt og eftirminnilegt. Eins og margir vita er Þráinn margverðlaunaður matreiðslumaður og eigandi veitingastaðanna ÓX og Sumac. ÓX, sem var opnaður árið 2018, er veitingastaður á heimsmælikvarða þar sem gestir njóta matarupplifunar innblásinnar af íslenskri matarhefð og þar er lögð áhersla á hráefni úr nærumhverfinu. ÓX hlaut sína fyrstu Michelin-stjörnu árið 2022 og græna Michelin-stjörnu, sem veitt er fyrir sjálfbærni, árið 2025.

Boðið var upp á fimm rétta matseðil ásamt nokkrum milliréttum, og sótti Þráinn innblástur í hefðbundna íslenska matargerð. Réttirnir voru byggðir á íslensku hágæðahráefni og fyrir þá sem vildu var boðið upp á vínpörun með hverjum rétti.

Ferðalag bragðlaukanna – réttir sem töluðu til allra skilningarvita

Ferðalagið sem Þráinn og félagar buðu upp á var ævintýri fyrir bragðlaukana, þar sem frumleiki og óvæntar samsetningar bragðs og áferðar léku við öll skilningarvitin.

Fyrsti rétturinn sem borinn var fram var grafinn karfi með íslensku wasabi, hnúðkáli og fíkjulaufi. Rétturinn var bæði fallegur og bragðgóður, og wasabi-rótin paraðist ákaflega vel með karfanum.

Frumleikinn var í fyrirrúmi þegar næsti réttur var borinn fram – sandvíkurrófur með skyri, stökku brauði og andareggjum. Óvenjuleg samsetning bragðs og áferðar kom skemmtilega á óvart.

Þriðji rétturinn var skötuselur, vin jaune, með kræklingi og hvönn – ómótstæðilega góður. Steikingin á skötuselnum var fullkomin og bragðgæðin einstök.

Fjórði rétturinn, og sá matarmesti, var nautaribeye – cap-hlutinn, sem hafði verið hægeldaður í um það bil tólf klukkustundir eftir snögga steikingu. Með nautinu voru kartöflur, blaðkál og vesturrósarostur.

Í lokin var boðið upp á dýrindis eftirrétt þar sem bláber léku aðalhlutverkið ásamt mascarpone-osti, lakkrís og pönnuköku í nýrri útfærslu.

Kyrrð, náttúrubað og hamingja í hjarta hálendisins

Kvöldið var ógleymanlegt og allir lögðu sitt af mörkum til að gera viðburðinn eftirminnilegan. Híbýlin í Kerlingarfjöllum eru hlýleg og andrúmsloftið rómantískt. Það er einhver dulúð í loftinu þarna í óbyggðunum, og dásamlegt að geta skroppið í náttúruböðin fyrir kvöldverðinn, sötrað heitt, þykkt súkkulaði og andað að sér fersku fjallaloftinu.

Eftir að hafa snætt kvöldverðinn og notið framúrskarandi þjónustu lagðist ég södd og sæl á koddann eftir dásamlegan dag í óbyggðum, fjarri öllu áreiti, og naut kyrrðarinnar.

Það verður enginn svikinn af upplifun sem þessari.