Palli var einn í heiminum og ætla mætti að Malin væri það líka en svo er auðvitað ekki. Lögregluteymi hennar er firnasterkt og bakland hennar þar traust. Lýsing á þessum kjarna, vinnubrögðum hvers og eins og viðbrögðum við óvæntum atburðum gerir mikið fyrir söguna og sýnir hvað öflug liðsheild skiptir miklu máli. Tengsl koma sér einnig vel, ekki síst náin fjölskyldutengsl.

Lygin gegnir veigamiklu hlutverki í bókinni. Allir hafa eitthvað að fela og sumir beita ýmsum brögðum til þess að hylja slóð sína, en eins og í raunheimum kemur sannleikurinn yfirleitt í ljós. Hann getur komið sér illa, ekki síst þegar laganna verðir eiga í hlut, en þegar öll sund virðast lokuð opnast stundum undankomuleiðir. Hvort þær leiða til góðs fer eftir aðstæðum. Líka hjá Malin.

Ofbeldi er yfirleitt eitt helsta einkenni glæpasagna. Glæpamenn eru gjarnan fól en ruddarnir leynast víða, líka á meðal þeirra sem taldir eru vammlausir eða eiga að vera það stöðu sinnar vegna. Vald, hatur og hefnd fara illa saman en skipta oft máli í þessum sögum. Villuljós er allt þetta og mikið meira. Spennandi frásögn með sálfræðilegu og heimspekilegu ívafi um líf og dauða. Frábær og trúverðug glæpasaga.