Staðreyndirnar tala sínu máli. Ung stúlka var drepin 4. júlí 1999 og grunaður maður, fyrrverandi kærasti hennar, var dæmdur til að sitja inni í 17 ár. Nafnlausa bréfið lætur Wisting samt ekki í friði. Þarna er ekki allt sem sýnist.

Höfundi bókarinnar er tamt að vera með nákvæmar lýsingar á umfjöllunarefninu hverju sinni. Þær geta verið yfirþyrmandi en engu að síður þétta þær frásögnina, útskýra hvað stendur að baki ákveðnum vinnubrögðum og öðru og auka þannig skilning á verklagi, háttum og siðum. Persónulýsingarnar segja einnig áhugaverða sögu og varpa ljósi á hugarheim þeirra sem helst eiga hlut að máli, skýra gerðir þeirra og jafnvel aðgerðaleysi. Ákveðnar persónur í raunheimum koma jafnvel upp í hugann við lesturinn og það gerir söguna enn ískyggilegri.

Wisting er nákvæmur út í ystu æsar og veltir við hverjum steini. Hann setur sig í spor annarra, lokuð sund reynast vera víða í völundarhúsinu en hægt og sígandi þrengist hringurinn, þrátt fyrir mótspyrnu ýmissa sem hafa hagsmuna að gæta.

Mál 1569 er spennandi og trúverðug glæpasaga með vendingum í allar áttir og heldur til haga mikilvægi þess að hafa réttsýna menn við stjórnvölinn. Menn eins og Wisting.