Víkingur kynnir nýja plötu

Í fréttatilkynningu frá Deutsche Grammophon kemur fram að Víkingur haldi á nýju plötunni áfram að skapa samtal milli ólíkra tónskálda og tímabila í tónlistarsögunni. Þar kemur fram að eftir alþjóðlega velgengni Goldberg-tilbrigðanna í flutningi Víkings hafi áhrif fjölradda tónsmíða Bachs á lokasónötur Beethovens orðið að spennandi upphafspunkti fyrir næsta verkefni píanóleikarans.

„Þegar ég fór að rannsaka hugmyndir að næsta verkefni mínu dróst ég strax að safni verka þar sem mér fannst ég finna fyrir nærveru Goldberg-tilbrigðanna á mjög innblásandi hátt,“ er haft eftir Víkingi í tilkynningunni og vísar þar til síðustu þriggja sónata Beethovens, þ.e. opus 109, 110 og 111. 

„Eftir nokkra daga í stúdíóinu mínu ákvað ég að hætta við þá margreyndu hugmynd að taka þessar þrjár frábæru lokasónötur upp og gefa þær saman út á einni plötu,“ segir Víkingur og bendir á að nokkur fjöldi píanista hafi tekið upp og gefið út þessi þrjú systurverk. 

„Í mínum huga fannst mér það að spila og hlusta á allar þjár sónöturnar í röð væri ekki endilega besta leiðin til að nálgast verkin á þessum tímapunkti,“ segir Víkingur og bætir við að með því að velja að hafa eina sónötu í forgrunni gæfist honum skemmtilegt tækifæri til að ferðast um braut verksins og uppgötva ný sjónarhorn á því, samtímis því að rekast á önnur tengd verk.  

Nýjasta plata Víkings Heiðars Ólafssonar nefnist Opus 109 sem vísar í samnefnt verk eftir Beethoven sem er í lykilhlutverki á plötunni. Ljósmynd/Ari Magg

Blaðamaður menningardeildar Morgunblaðsins settist nýverið niður með Víkingi í nýju vinnustofu hans og fékk tóndæmi af plötunni sem væntanleg er 21. nóvember.

Víkingur fylgir plötunni eftir með tónleikum vítt og breitt um heiminn á næstu mánuðum, en meðal viðkomustaða verða Louisiana í Danmörku, Óperuhúsið í Osló, Konzerthaus í Hanover, Philharmonie í Berlín, Elbphilharmonie í Hamborg og Konzerthaus í Vín.

Aðspurður segist Víkingur munu leyfa íslenskum áheyrendum að heyra Opus 109 á útgáfutónleikum í Eldborg Hörpu í byrjun aprílmánaðar 2026. 

 Deutsche Grammophon