Myndir: Óskar og Heimir fylltu Hörpu

Söngvarinn Óskar Pétursson frá Álftagerði, Karlakórinn Heimir og tveir bræður Óskars ásamt frændfólki troðfylltu Eldborg í Hörpu á sunnudag. Þá fóru fram fjórðu tónleikarnir undir yfirskriftinni Blessuð sértu sveitin mín.

Áður höfðu Óskar og félagar haldið tvenna tónleika í Hofi á Akureyri og þeir fyrstu voru á heimaslóð í menningarhúsinu Miðgarði í Skagafirði.

Ljósmyndarinn Mummi Lú var í Eldborg og fangaði stemninguna á sviði á filmu. Tónleikarnir þóttu takast mjög vel og ætlaði fagnaðarlátum áhorfenda seint að linna.

Hljómsveit undir stjórn Valmars Väljaots lék undir hjá Óskari og Heimi en stjórnandi kórsins er Jón Þorsteinn Reynisson, undirleikari Alexander Edelstein. Einsöngvarar úr Heimi tóku einnig lagið, þeir Snorri Snorrason og Guðmundur Ásgeirsson.

Eftir að Heimismenn höfðu tekið nokkur lög þá byrjaði Óskar á að syngja Rósina, eftir Friðrik Jónsson, í fallegri útsetningu þar sem Valmar lék einnig undir á fiðlu. Undir lokin fór Óskar upp á háa C-ið með Hamraborginni og hið víðfræga lag, O sole mio, tók Snorri með Óskari og saman gerðu þeir það lipurt og fóru létt með.

„Álftagerðisbræðrum“ hefur fjölgað

Formaður karlakórsins, Atli Gunnar Arnórsson, var jafnframt kynnir og reytti af sér brandarana inni á milli laga. Hann kom einnig fram sem hluti af „Álftagerðisbræðrum", þ.e. sem tengdasonur Gísla Péturssonar. Óskar og Pétur Péturssynir voru í þeim hópi sem og börn og barnabörn Gísla; dæturnar Kristvina og Gunnhildur, sonurinn Agnar, Lydía, dóttir Kristvinu og tveir synir Agnars; Jóel og Ísak.

Sannkölluð tónlistarveisla þar sem skyldleikar söngmanna voru óendanlega miklir þegar kórinn er tekinn með í reikninginn. Þannig á yngsti maður í Heimi, hinn 15 ára Fjölnir Marinósson, bæði föður og afa í kórnum, sem og frændur.