Andrea Pirlo gæti tekið við enska knattspyrnufélaginu Everton á næstu dögum. Það er Liverpool Echo sem greinir frá þessu.
Pirlo var rekinn sem stjóri Juventus í síðustu viku en hann hefur átt í viðræðum við Farhad Moshiri, eiganda Everton, um að taka við félaginu.
Carlo Ancelotti lét af störfum sem stjóri Everton í vikunni til þess að taka við stjórastöðunni hjá Real Madrid.
Pirlo, sem er 42 ára gamall, varð sex sinnum Ítalíumeistari á ferlinum með bæði AC Milan og Juventus.
Hann gerði Juventus að bikarmeisturum á tímabilinu en liðið féll úr leik í sextán liða úrslitum Meistaradeildarinnar, ásamt því að hafna í fjórða sæti deildarinnar, og því var Pirlo rekinn.
Gylfi Þór Sigurðsson, landsliðsmaður Íslands, er samningsbundinn Everton til sumarsins 2022 en hann hefur leikið með félaginu frá árinu 2017.