Ég veit ekki hvort þú ert með krús (cruise control) í bílnum þínum, en ef svo er geturðu örugglega notað það oftar til að spara eldsneyti og fara betur með bílinn. Ég hef notaði krúsið á mínum bíl í utanbæjarakstri, en ekki mikið innanbæjar fyrr en nú nýlega. Ég sá það nefnilega svart á hvítu að meðaleyðslan á 100 km á bílnum mínum hrapaði þegar það var notað. Eins og alltaf eykst eldsneytiseyðslan yfir vetrarmánuðina, bæði vegna vetrardekkja og færðar eða það taldi ég að minnsta kosti,svo ég var eiginlega að bíða eftir vori þar til hún færi að falla á ný.

Ég komst hins vegar að því að með því að keyra með krúsið á innanbæjar er hægt að lækka hana töluvert eða um hálfan lítra að meðaltali á hverja 100 km. Þetta kom í ljós þegar annar bílstjóri keyrði bílinn minn um tíma. Eldri sonur minn var nýlega í heimsókn hér á landi og fékk bílinn nokkrum sinnum lánaðan á meðan á dvöl hans stóð. Hann er vanur að keyra alltaf með krúsið á þar sem hann býr erlendis, svo hann gerði slíkt hið sama hér og meðaleyðsla bílsins tók að falla. Mér finnst frábært að hafa komist að þessu og ekki verra að gera það í GRÆNUM APRÍL.

Ég ek á milli 15-20 þúsund km á ári hverju og ef ég get sparað rúmlega 100 krónur á hverja 100 km sem ég ek, sparast dágóð upphæð árlega, svo í mínum huga er knúsið nú málið - bæði innan- og utanbæjar.