Suður-Kórea vann til gullverðlauna í 3.000 metra skautaboðhlaupi kvenna á Vetrarólympíuleikunum í Pyeongchang í Suður-Kóreu í dag.
Choi Min-jeong tryggði gestgjöfunum gullverðlaunin en hún skautaði tvo síðustu hringina og Suður-Kórea varði ólympíumeistaratitil sinn í greininni. Ítalir unnu til silfurverðlauna og Hollendingar fengu bronsverðlaunin. Sveitir Kína og Kanada voru dæmdar úr leik.
Þetta voru önnur gullverðlaun Choi Min-jeong á leikunum en hún hrósaði sigri í 1.500 metra skautahlaupinu um síðustu helgi.