Sjóræningjar hafa rænt 12 manna áhöfn á svissnesku flutningaskipi og halda henni nú í gíslingu. Samkvæmt skipafélaginu sem á skipið var það á leið frá Lagos til Port Harcourt með hveiti þegar ráðist var á það á laugardaginn. BBC greinir frá.
Sjóræningjarnir notuðu langa stiga til að komast um borð í skipið og byrjuðu á því að eyðileggja fjarskiptabúnað. 19 manna áhöfn var um borð en 12 voru teknir í gíslingu. Enginn úr áhöfninni er svissneskur ríkisborgari en fjölskyldum þeirra hefur verið greint frá stöðunni, samkvæmt upplýsingum frá skipafélaginu.
Sérfræðingar í gíslatöku eru á leið á staðinn í þeirri von að leysa megi áhöfnina úr haldi sjóræningjanna hratt og örugglega.
Mannrán eru algeng í Nígeríu, og er þá aðallega verið að ræna útlendingum og þekktum Nígeríumönnum. Gíslatökum hefur fjölgað undan ströndum Nígeríu síðustu ár og svo virðist sem fleira fólki sé haldið lengur en áður.