Tíst Donald Trump, forseta Bandaríkjanna, á Twitter þar sem hann dró í efa sannleiksgildi frásagnar Christine Blasey Ford, sem sakað hefur Kavananaugh, dómaraefni Trumps, um kynferðislegt ofbeldi þegar þau voru á táningsaldri, hefur nú getið af sér nýtt myllumerki í anda #metoo. BBC greinir frá.
Forsetinn sagði á Twitter á föstudag að ef hin meinta árás hefði „verið jafnslæm og hún sagði“ hefði Ford, eða foreldrar hennar, lagt fram kæru.
Nú hefur orðið til myllumerkið #WhyIDidntReport eða „af hverju lagði ég ekki fram kæru“ og þegar þetta er ritað hafa tæplega 700 þúsund tíst birst undir merkinu. Margar kvennanna tala um hvernig þær hafi upplifað skömm og fundist þær vanmáttugar. Þá hafi þær upplifað ótta við að vera ekki trúað. Þær hafi hins vegar eytt mörgum árum og jafnvel áratugum í að reyna að vinna úr erfiðri reynslu eða gleyma henni.
Frétt mbl.is: Dregur frásögnina í efa
Margar þekktar leikkonur hafa stigið fram undir merkinu og sagt af hverju þær kærðu ekki. Ein þeirra er Alyssa Milano sem var áberandi í #metoo-byltingunni.
Hún ávarpar Trump í tístinu og segir honum frekar óblíðlega að hlusta. „Ég hef tvisvar orðið fyrir kynferðisofbeldi. Í annað skiptið þegar ég var unglingur. Ég kærði aldrei til lögreglu og það tók mig 30 ár að segja foreldrum mínum.“