Söngkonan Katy Perry var að fara í gegnum gamalt dót á dögunum þegar hún fann bréf frá því hún var 12 ára. Í bréfinu kom fram að hún hefði verið rekin í nokkra daga úr skóla. Perry þótti ekki sýna góða kristilega hegðun í skólanum. Sjálf segir Perry að hún hafi verið rekin fyrir að riðlast á tré og fyrir ýmislegt annað.

Í lýsingu í bréfinu má sjá nánari útlistun á því hvernig Perry braut af sér. Voru hún og fjórir aðrir nemendur á stað sem nemendur máttu ekki fara á þar sem hún var gripin glóðvolg undir tré. Lét Perry sem tréð væri Tom Cruise og hreyfði mjaðmirnar eins og í kynlífi. 

Var þetta atvikið sem fyllti mælinn en Perry hafði áður fengið aðvaranir fyrir ljótan talsmáta. Auk þess lék hún sér í flöskustút og öðrum leikjum sem ekki þóttu við hæfi. Ekki þótti heldur við hæfi að dansa Macarena á ganginum.