Tónlistarmaðurinn Chris Brown er í varðhaldi í París eftir að kona lagði fram kæru á hendur honum vegna nauðgunar. Sagt er að Brown hafi nauðgað konunni 15. janúar eftir að hann hitti hana á næturklúbbi í frönsku höfuðborginni.
Samkvæmt AP-fréttaveitunni eru tveir aðrir í varðhaldi auk Brown, annar þeirra lífvörður tónlistarmannsins.
Brown var tekinn til fanga í gær og var enn í haldi í dag á meðan málið er til rannsóknar.
Útgáfufyrirtæki Brown, Sony Music, hefur ekki tjáð sig um málið.
Chris Brown er þekktur fyrir ofbeldishegðun sína síðustu ár er hann var dæmdur fyrir að beita fyrrverandi kærustu sína, Rihanna, ofbeldi árið 2009. Hann fékk 5 ára skilorðsbundið fangelsi og þurfti að sinna samfélagsþjónustu.