„Málið er í rannsókn og gerum okkur vonir um að það gangi hratt fyrir sig. Við vonumst til að ná að klára þetta í þessum mánuði og geta sent það til héraðssaksóknara,“ segir Ólafur Helgi Kjartansson, lögreglustjóri á Suðurnesjum, við mbl.is um rannsókn embættisins á innflutningi á tveimur kílóum af metamfetamíni til landsins frá Kanada. Þetta kom fyrst fram í kvöldfréttum Stöðvar tvö.
Þrír karlmenn eru í gæsluvarðhaldi grunaðir um að hafa smyglað tveimur kílóum af metamfetamíni 28. júní síðastliðinn. Þeir eru allir íslenskir ríkisborgarar.
„Mér er ekki kunnugt um að hafa lagt hald á svona mikið magn í einu. Ég hef ekki orðið vitni að því á mínum starfsferli,“ segir Ólafur Helgi um magnið.