Forsvarsmenn lyfjafyrirtækisins Johnson & Johnson flýttu sér í síðasta mánuði til að láta gera rannsóknir á barnapúðrinu sem fyrirtækið framleiðir, eftir að bandaríska lyfjaeftirlitið (FDA) fann leifar af asbest í brúsa af barnapúðri.
Greint var frá því lok síðasta mánaðar að Johnson & Johnson hefðu látið innkalla 33.000 flöskur af barnapúðri eftir að FDA tilkynnti um þennan fund, en innköllunin takmarkaðist við eina framleiðslulotu, númer 22318RB, sem framleidd var og fór í dreifingu og sölu í Bandaríkjunum á síðasta ári.
11 dögum síðar tilkynnti fyrirtækið svo við athugun óháðra rannsóknarstofa hefðu engar slíkar leifar fundist í púðrinu.
Wall Street Journal greinir frá og segir niðurstöður rannsóknarinnar þó hafa verið flóknari en lyfjafyrirtækið greindi frá, en forsvarsmenn Johnson & Johnson lögðu mikla áherslu á að klára rannsóknina sem fyrst.
https://www.mbl.is/frettir/erlent/2019/10/20/innkalla_33_000_floskur_af_barnapudri/
Wall Street Journal segir að rannsóknarfyrirtækið sem lyfjafyrirtækið fékk til verksins hefði breytt sínu hefðbundna vinnsluferli til að mæta kröfu Johnson & Johnson að því er fram kemur í skýrslunni og var því einnig notað við rannsóknina tilraunaherbergi sem venjulega er notað til að rannsaka leifar af byssupúðri í glæparannsóknum. Við upphaflegu rannsóknina fann rannsóknarstofan leifar af asbesti í sumum sýnanna, en ákvarðaði síðar að um væri að ræða mengun frá loftræstikerfi herbergisins. Við endurprófanir í rannsóknarstofunni sem venjulega er notuð til slíkra verka greindist ekkert asbest.
Annað rannsóknarfyrirtæki sem einnig var fengið til að rannsaka barnapúðrið greindi Johnson & Johnson frá því að engar leifar af asbesti hefðu fundist við forkönnun, en rannsókninni var þó ekki að fullu lokið þegar lyfjafyrirtækið tilkynnti að engar asbestleifar hefðu greinst.
https://www.mbl.is/frettir/erlent/2018/12/14/vissu_vel_af_asbesti_i_barnapudrinu/
Forsvarsmenn Johnson og Johnson segja málið enn vera í skoðun og sýni verði áfram tekin við framleiðslu barnapúðursins.
Um 16.000 þúsund konur hafa höfðað mál á hendur hreinlætis- og lækningavöruframleiðandanum þar sem þær telja að talkúm í barnapúðri frá fyrirtækinu hafi valdið þeim krabbameini. Dómar hafa fallið í nokkrum málanna og skaðabætur verið greiddar í einhverjum þeirra. Konurnar höfðu notað barnapúðrið, eða annað sambærilegt púður frá fyrirtækinu, í kringum kynfærin á sér í hreinlætisskyni. Sjálft barnapúðrið hefur hins vegar verið notað áratugum saman á húðfellingar barna og á bleyjusvæði til að koma í veg fyrir roða og útbrot.
Í umfjöllun Reuters-fréttastofunnar á síðasta ári var fullyrt að stjórnendur Johnson & Johnson hafi vitað að asbestmengað talkúm hafi verið notað í barnapúðrið áratugum saman. Og að reynt hafi verið að hylma yfir það.
Forsvarsmenn lyfjafyrritækisins fullyrða hins vegar að talkúmið sem notað er í vörur þeirra sé ekki asbestmengað.