Búið er að tengja háspennukapal úr varðskipinu Þór yfir í spenni í landi á höfninni á Dalvík, en þaðan á svo að leiða rafmagnið í næstu spennistöð, en samtals verður hægt að flytja 2 megawött í land og á það að nægja til að halda bæjarfélaginu rafvæddu.

mbl.is fékk að kíkja niður í vélarrúm varðskipsins, en þar unnu meðal annars þeir Ómar Þór Júlíusson yfirvélstjóri og Einar Hansen, tæknistjóri á skipasviði, að því að koma öllu í stand áður en hleypa átti rafmagninu á spenninn.

Einar segir þetta í fyrsta skiptið hér á landi sem bæjarfélag sé knúið áfram af skipi sem þessu, en vonir standa til að það verði núna síðar í nótt.

Fyrr í kvöld var minni rafstöð komið upp við spennistöð í bænum og var rafmagn komið á lítinn hluta bæjarins, á að giska um 10%, um átta í kvöld.