Opnað hefur verið fyrir innsendingar á kvikmynda- og sjónvarpsverkum fyrir Edduna 2021. Gjaldgeng eru verk frumsýnd opinberlega á tímabilinu 1. janúar til 31. desember 2020.

Innsendingaferlið er að fullu rafrænt á nýjum innsendingarvef Eddunnar, að því er segir í tilkynningu.

Á stjórnarfundi Eddunnar síðastliðið haust var tekin ákvörðun um breytingar á fjölda tilnefninga fyrir hver verðlaun. Þrjú verk verða tilnefnd í hverjum flokki, burtséð frá fjölda innsendinga. Ennfremur var ákveðið að valnefndir komi saman og starfi í formi dómnefndar.

Gjald fyrir innsent verk í aðalflokk Eddunnar 25.000 krónur og innsending í flokk fagverðlauna kostar 5.000 krónur (verð eru án vsk).

Frestur til að senda inn verk rennur út á miðnætti þriðjudaginn 11. febrúar 2021 og strax í kjölfarið hefja valnefndir Eddunnar störf. Stefnt er að tilkynningu tilnefninga í lok mars og að Edduverðlaunin verði veitt á vormánuðum.