Uppskriftin að kryddblöndu KFC er jafn leyndardómsfull og uppskriftin að Coca-Cola. Það hefur þó ekki stoppað fólk í að reyna sig við blönduna og eru fjölmargar ansi góðar eftirlíkingar í boði á veraldarvefnum.
Í Bretlandi hófu göngu sína á dögunum þættirnir Snackmasters þar sem þrír meistarakokkar reyna eftir bestu getu að endurgera heimsfrægar uppskriftir og riðu þeir á vaðið með KFC-formúlunni.
Þetta er uppskriftin sem bar sigur úr býtum í þessum fyrsta þætti og það verður forvitnilegt að prófa hana.
KFC-blandan að hætti Snackmasters
- 4,5 g svartur pipar
- 7,5 g hvítur pipar
- 20 g hvítlauksduft
- 1 g þurrkað óreganó
- 2 g paprikuduft
- 170 g hveiti
- 20 maísmjöl
- 12 g sykur
- 1 g þurrkað timían
- 3 g sellerísalt
- 10 g sinnepsduft
- 3 g engifer
- 15 g laukduft
- 1 g basil
- 5 g cayenne
- 11 g salt
- kjúklingabitar að eigin vali
Aðferð:
- Blandið kryddi og jurtum saman við hveitið.
- Penslið bitana með eggjum og mjólk.
- Hjúpið kjúklinginn vel með hveitikryddblöndunni.
- Djúpsteikið í fimm til sex mínútur og setjið svo í ofnskúffu til að fullelda. Snöggdjúpsteikið svo aftur áður en þið berið bitana fram.