Eduardo Bolsonaro, sonur Jairs Bolsonaros forseta Brasilíu, tilkynnti í gær að hann hefði greinst með kórónuveiruna.
Eduardo er þar með þriðji fulltrúi sendinefndar Brasilíu á allsherjarþingi Sameinuðu þjóðanna í New York til að greinast með veiruna.
Eduardo sagði á Twitter að sér liði vel og tæki lyf án þess að tilgreina nákvæmlega hvers lags lyf hann væri að innbyrða.
https://www.mbl.is/frettir/erlent/2021/01/12/notar_profilmynd_af_trump_a_twitter/
Hann sagði veikindi sín sönnunargögn í herferð sinni gegn bólusetningarvottorðum, en vottorðin voru nýlega kynnt til sögunnar í nokkrum brasilískum borgum.
„Við vitum að bóluefnin voru framleidd hraðar en oft áður. Ég fékk fyrsta skammt af Pfizer-bóluefninu en ég fékk Covid,“ sagði hann og bætti við:
„Þýðir þetta að bóluefnin séu gagnslaus? Nei. En ég trúi því að þetta séu enn ein rökin gegn bólusetningarvottorðinu.“