Önnur umferð forsetakosninga er framundan í Brasilíu þar sem fyrrverandi forsetinn og vinstrimaðurinn Luiz Inacio Lula da Silva etur kappi við núverandi forseta landsins, hægrimanninn Jair Bolsonaro.
Lula, sem er 76 ára, hlaut 48,4% atkvæða í forstakosningunum og tókst því ekki að ná þeim 50 prósentum atkvæða sem þörf er á til að komast hjá annarri umferð.
Bolsonaro, sem er 67 ára, hlaut fleiri atkvæði en búist var við og endaði með 43,2%.
Fyrir kosningarnar, sem fóru fram í gær, var Lula spáð 50% atkvæða og Bolsonaro 36%.
Önnur umferð kosninganna fer fram 30. október.