Brighton er komið í 16-liða úrslit enska bikarsins í fótbolta eftir 2:1 sigur á Liverpool á The American Express Community Stadium í Brighton í dag.
Fyrri hálfleikurinn var afar fjörugur og bæði lið sköpuðu sér helling af góðum stöðum. Strax á þriðju mínútu bjargaði Lewis Dunk skoti Mohamed Salah af línu og rúmum tíu mínútum síðar endurgreiddi Trent Alexander-Arnold greiðan og bjargað skoti Evan Ferguson á línu.
Harvey Elliott kom Liverpool yfir á 30. mínútu. Þá þræddi Salah unga Englendinginn í gegn sem setti svo boltann í netið framhjá, en þó með viðkomu í, Jason Steele og gestirnir komnir yfir.
Níu mínútum síðar fékk Brighton-liðið hornspyrnu. Úr henni barst boltinn til Tariq Lamptey sem skaut utan teigs. Skotið hans fór hinsvegar í Dunk og af honum í netið framhjá Alisson og Brighton-menn búnir að jafna á skrautlegan hátt, 1:1.
Síðari hálfleikur var ekki jafn opinn og sá fyrri framan af og lokuðu liðin vel á hvort annað. Á 71. mínútu fékk Solly March mjög gott færi eftir glæsilega utanfótar sendingu frá Karou Mitoma en Alisson varði frábærlega og boltinn fór aftur í March og framhjá.
Evan Ferguson komst tíu mínútum síðar í fínt færi en Ibrahima Konaté bjargaði á ögurstundu.
Allt stefndi til þess að leikurinn þyrfti að vera endurtekinn á Anfield en á fyrstu mínútu uppbótartíma fékk Brighton aukaspyrnu. Pascal Gross sendi háan bolta á Pervis Estupinán sem kom boltanum á fjærstöngina á Mitoma. Mitoma tók á móti boltanum, vippaði honum svo yfir Joe Gomez og setti hann glæsilega í þaknetið og tryggði Brighton áfram í 16-liða úrslitin.
Það er því ljóst að Liverpool ver ekki bikarmeistaratitil sinn.