Með gangsetningu nýrrar skipaskrá, Skútunni, var tekið upp það verklag að gefa út haffærisskírteini með fullum gildistíma þótt niðurstaða skoðunar feli í sér að athugasemd er skráð á skipið, að því er fram kemur í tilkynningu á vef Samgöngustofu.

Fram kemur að breytingin frá því sem áður var felst í því að gildistími haffærisskírteinis er ekki takmarkaður ef niðurstaða skoðunar er svokölluð dæming 2. Í staðinn er gefið færi á að vinna að úrbótum og láta framkvæma endurskoðun innan þriggja mánaða, sé það ekki gert fellur haffærisskírteini úr gildi.

Við útgáfu á haffærisskírteini tilkynnir Samgöngustofa viðeigandi útgerð um það hvort endurskoðun er á dagskrá og þá hvenær haffærisskírteini fellur úr gildi. „Kostirnir við þetta eru, að útgerð þarf aðeins að sækja einu sinni um haffærisskírteini milli reglubundinna skoðana og greiðir einu sinni fyrir útgáfu haffærisskírteinis yfir árið,“ segir í tilkynningunni.

https://www.mbl.is/200milur/frettir/2023/06/12/tveggja_aratuga_skraningarkerfi_heyrir_sogunni_til/

Fjórar mögulegar niðurstöður

Samgöngustofa vekur athygli á því hvað felst í mismunandi stigum dæmingar sem er frá 0 til 3.

Dæming 0 í skoðun felur í sér að engin athugasemd hefur verið skráð á skipið og fær skipið útgefið haffærisskírteini með fullum gildistíma.

Dæming 1 í skoðun felur í sér að um minniháttar athugasemd var skráð á skipið, en að ekki er þörf á endurskoðun og fær skipið útgefið haffærisskírteini með fullum gildistíma. Útgerð ber þó ábyrgð á að því að gera viðeigandi lagfæringar í samræmi við athugasemd.

Er niðurstaða skoðunar dæming 2 hefur skipið fengið skráða athugasemd og fær skipið þrátt fyrir þetta útgefið haffærisskírteini með fullum gildistíma, en fær jafnframt dagsetningu fyrir endurskoðun. Gefinn er allt að þriggja mánaða frestur til úrbóta og þarf að framkvæma lagfæringu og kalla eftir endurskoðun áður en frestur rennur út. Hafi lagfæring ekki farið fram innan frests og endurskoðun verið framkvæmd af skoðunaraðila því til staðfestingar fellur haffærisskírteini skipsins úr gildi.  Þetta felur þá í sér að skipið telst óhaffært og ekki er hægt að lögskrá á skipið.

Skipð telst vera óhaffært fái það dæmingu 3 og getur það ekki fengið útgefið haffærisskírteini.