Áhrifavaldurinn Lele Pons skemmti sér konunglega á íslenska skemmtistaðnum Exit í Austurstræti að því er sést á myndböndum í hringrás stjörnunnar á Instagram.

Þar sást til hennar dansa uppi á sviði við mikinn fögnuð viðstaddra og freistuðu þess nokkrir að taka mynd af sér með henni.

Pons er með 55 milljónir fylgjenda á Instagram og varð fyrst þekkt fyrir grínmyndbönd sín á samfélagsmiðlinum Vine en færði sig síðar yfir á YouTube. Þá leikur hún í raunveruleikaþáttunum The Secret Life of Lele Pons og hefur tekið að sér verkefni sem söngkona.