Þessi fiskréttur er fljótlegur og góður, einmitt það sem maður þarf í miðri viku. Mozzarella-osturinn gerir réttinn svo góðan og er lykilatriðið hér ásamt pestóinu. Uppskriftin kemur úr smiðju snillingsins, Helgu Möggu heilsumarkþjálfa en hún deildi myndbandi að gjörningnum á Instagram-síðu sinni þar sem fylgjendur geta leikið listina eftir. Berið fram með því sem hugurinn girnist til að mynda með hrísgrjónum eða bankabyggi.
Mozzarella fiskréttur
Fyrir 4-5
- 860 g ýsuflök
- 180 g rautt pestó
- 1 dós mozzarella-perlur
- 10-12 döðlur/110 g
- Basilíka handfylli
- Salt og pipar eftir smekk
Aðferð:
- Byrjið á því að hita ofninn í 180°C hita.
- Því næst er lag að skola fiskinn og þerra, skera svo flökin niður í hæfilega stóra bita. Raðið fisknum í botninn á eldföstu móti og kryddið fiskinn með salti og pipar eftir smekk.
- Setjið rauða pestóið yfir fiskinn og dreifið því vel yfir alla bitana.
- Skerið döðlurnar í bita og raðið yfir fiskinn.
- Setjið síðan mozzarella-kúlurnar yfir fiskinn ásamt niðurskorinni ferskri basilíku.
- Setjið því næst réttinn inn í ofn og bakið við 180°C hita í 25 mínútur.
- Á meðan er tilvalið að sjóða hrísgrjón, útbúa salat eða jafnvel hita hvítlauksbrauð.
- Berið fram með því sem hugurinn girnist og njótið.