Heildartekjur Icelandair jukust um 11% á milli ára og námu 35,8 milljörðum króna á fyrsta ársfjórðungi 2024. Það gerir ársfjórðunginn tekjuhæsta fyrsta ársfjórðung í sögu félagsins.

Tap félagsins nam þó 7,8 milljörðum króna á sama tímabili.

Þetta er meðal þess sem kemur fram í uppgjöri fyrirtækisins sem var birt í Kauphöll rétt í þessu.

Þar kemur einnig fram að fyrirtækið hafði metfarþegatekjur fyrstu 3 mánuði ársins sem námu samtals 27,5 milljörðum króna og er það aukning um 17% milli ára. Þá lækkaði einingakostnaður um 5% og kemur fram að flotaendurnýjun og aukin skilvirkni í rekstri hafi haft áhrif til lækkunar á einingakostnaði.

Afkoma fyrsta ársfjórðungs var í takt við væntingar fyrirtækisins en áhrif alþjóðlegrar umfjöllunar um eldgos á Reykjanesskaga lituðu rekstrarniðurstöðuna í janúar, að því er haft er eftir Boga Nils Bogasyni forstjóra Icelandair í tilkynningunni.

Farþegafjölgun og góð afkoma í leiguflugi

Farþegum Icelandair fjölgaði um 14% og voru þeir samtals 757 þúsund. Þar af voru farþegar til Íslands 284 þúsund. Framboð í farþegaleiðakerfinu jókst um 21%.

„Leiguflugið skilaði áfram góðri afkomu en sú starfsemi skilar mikilvægum tekjum og arðsemi inn í félagið og dregur úr áhrifum árstíðasveiflu með bættri nýtingu flota og áhafna allan ársins hring,“ er haft eftir Boga Nils.

Í tilkynningunni kemur einnig fram að mikill viðsnúningur hafi orðið í fraktstarfsemi, eða sem nam 535 milljónum króna.

Áhersla á skilvirkni og lægri kostnað

 „Árið 2023 lauk endurreisn Icelandair eftir heimsfaraldurinn og reksturinn skilaði hagnaði á ný. Nú í ár er áhersla okkar fyrst og fremst á aðgerðir til að ná fram aukinni skilvirkni í rekstrinum, lækka kostnað og styrkja tekjumyndun enn frekar,“ er haft eftir Boga.

„Við höfum þegar gripið til fjölmargra aðgerða, til dæmis einfaldað skipulag félagsins og fækkað stjórnendum og útvistað starfsemi flugeldhússins í Keflavík sem er eitt stærsta framleiðslueldhús landsins, með um 200 stöðugildi. Þá er vinna hafin að fjölmörgum öðrum verkefnum til að auka skilvirkni.“