Það eru kannski fáir sem leggja leið sína til Bretlands til þess að liggja á ströndinni, en Bretland lumar þó á mörgum spennandi og undurfögrum ströndum sem geta komið skemmtilega á óvart á góðum sumardegi. 

Nýverið tók ferðavefur Condé Nast Traveller saman lista yfir bestu strendurnar í Bretlandi, en hér fyrir neðan má sjá fimm strendur sem prýða listann og þykja með þeim fallegustu. 

Seven Sisters

Í austurhluta Sussex-sýslu er að finna hina fögru kletta Seven Sisters, en nafnið vísar til sjö tinda þessara kletta sem gleðja sannarlega augað. Vanir göngugarpar geta gengið meðfram klettunum, en frá þeim er glæsilegt útsýni.

Durdle Door

Á Jurassic-strandlengjunni í Dorset er sjarmerandi strönd við hið fræga Durdle Door sem er kalksteinsbogi sem liggur á milli tveggja stranda. Til þess að komast á ströndina þarf að klifra niður nokkur hundruð þrep í klettinum, en að mati margra er það vel þess virði. 

Rhossili Bay

Gower skaginn í Wales státar af einni fegurstu strandlengju Bretlands, en í vesturenda hennar er að finna Rhossili Bay sem einkennist af hvítum sandi og bröttum kalksteinsklettum. 

Llanddwyn

Á eyjunni Llanddwyn í Wales er sérlega fögur strandlengja sem teygir sig tæpa fimm kílómetra eftir eyjunni. Hún er þekkt sem „strönd rómantíkarinnar“ og býður upp á fallegt landslag, spennandi dýralíf og notalega stemningu. 

Cuckmere Haven

Þeir sem kunna betur við sig á jafnsléttu en vilja upplifa töfra Seven Sisters klettanna geta dáðst að þeim frá Cuckmere Haven-ströndinni, en hún þykir ein besta ströndin í nálægð við Lundúni.