Björgunaraðilar brugðust skjótt við þegar tilkynning barst um sundmenn í neyð við strönd Matua í Tauranga við strendur Nýja-Sjálands.
Lögreglan, ásamt Aerocool Rescue Helicopter, neyðarþyrlu svæðisins, og Tauranga-sjóbjörguninni, hóf leit á mánudagskvöld nærri Fergusson Park. Þetta kemur fram hjá nýsjálenska fjölmiðlinum SunLive.
Leitin stóð yfir í um 45 mínútur áður en lögregla gaf fyrirmæli um að hætta. Ástæðan? Lögregla komst að þeirri niðurstöðu að engir sundmenn væru í neyð á svæðinu – heldur aðeins hópur gæsa sem virtist eiga erfitt uppdráttar á vatninu.
Talsmaður Tauranga-sjóbjörgunarinnar hrósaði þó viðkomandi fyrir að hafa brugðist við.
„Það er alltaf betra að hafa vaðið fyrir neðan sig,“ sagði hann í samtali við SunLive.