Eftir Gunnar Guðmundsson frá Heiðarbrún: „Nú ætti að fá lærða rannsakendur, sem búa yfir sterku innsæi og dómgreind, til að skoða þetta mál frá grunni.“
Geirfinnsmálið er svo margslungið mál, að þörf er á eftirfarandi viðauka við fyrri grein mína um sama mál.
Leirfinnur
Á þessum tíma voru ekki til farsímar og sumir „útréttingamenn“ fengu á ferðum sínum oft að fara í síma til að boða komu sína og greiða fyrir erindrekstri sínum. Mér finnst heldur ósennilegt, að maður sem ætlar að eiga alvarleg samskipti við Geirfinn í aðdraganda hvarfs hans, hafi byrjað á því að ganga inn í Hafnarsjoppuna, þar sem hann gat orðið á vegi fólks sem þekkti hann og fá þar að hringja, þar sem fólk gat hugsanlega heyrt hvert orð sem hann segði.Er ekki líklegra að hringt hafi verið í Geirfinn úr heimahúsi? Með það í huga, er að sumu leyti líklegt að „Leirfinnur,“ maðurinn í leðurjakkanum, sem vildi hringja úr Hafnarsjoppunni, sé hvarfi Geirfinns með öllu óviðkomandi og þar hafi rannsakendur lent inni á miklum villigötum?
...