Óhætt er að segja að Dagur B. Eggertsson borgarstjóri fjalli með niðrandi hætti um mig í nýrri bók sinni, sem ber nafnið „Nýja Reykjavík“.
Á bls. 74 segir: „Ólafur F. bar aldrei sitt barr eftir þessi ósköp. Hann bauð sig fram aftur og fékk einungis 274 atkvæði, minna en hálft prósent, í kosningunum 2010. Þannig var dómur kjósenda.“ Hér ruglar Dagur saman fylgi óháðs framboðs míns, sem hlaut 668 atkvæði og 1,1% fylgi, og fylgi Helgu Þórðardóttur, sem leiddi Frjálslynda flokkinn. Lítið fylgi mitt var viðbúið eftir harkalegt einelti vinstrimanna á hendur mér, þar sem Dagur B. kom mjög við sögu. Dagur var sannarlega þátttakandi í eineltinu gegn mér um langt árabil. Dagur stóð auk þess að lögsókn gegn mér árið 2012 þar sem ég var að tilefnislausu sakaður um fjárdrátt. Við það lagðist ég í alvarlegt þunglyndi, allt árið 2012 og fram til vorsins 2013.