Í Íslandssögunni er 10. maí einn af stóru dögunum. Þá, árið 1940, fyrir 85 árum, hernámu Bretar Ísland, sem var þýðingarmikil aðgerð í heimsstyrjöldinni sem þá var hafin. Þjóðverjar ásældust norðurhöf sem varð að verja
Elliðaárdalur Skotbyrgi falið í skógarrjóðri í brekku neðan við einbýlishús í Hólahverfi Breiðholts í Reykjavík.
— Morgunblaðið/Sigurður Bogi
Sigurður Bogi Sævarsson
sbs@mbl.is
Í Íslandssögunni er 10. maí einn af stóru dögunum. Þá, árið 1940, fyrir 85 árum, hernámu Bretar Ísland, sem var þýðingarmikil aðgerð í heimsstyrjöldinni sem þá var hafin. Þjóðverjar ásældust norðurhöf sem varð að verja. Herskip Breta, tvö beitiskip og fimm hundruð spillar, renndu inn á Reykjavíkurhöfn á óttu nætur. Áður hafði stór flugvél flogið yfir Reykjavík; eins konar váfugl sem boðaði hvað í uppsiglingu væri.
Hermennirnir, fyrsti hópurinn sem var um 750 manns, voru að hluta unglingspiltar frá Jórvíkurskíri á Englandi með litla herþjálfun. Fyrirstaðan í Reykjavík var heldur engin, samanber að lögreglulið Reykjavíkur var þegar þetta gerðist að stærstum hluta á Laugarvatni við æfingar.