Veiking landsbyggðar mesta breytingin

Hamfarafréttamaðurinn í gula vestinu er gestur Dagmála í dag. Hann hefur í 45 ár skrifað fréttir og flutt til almennings. Enn þann dag í dag vaknar hann flesta daga og fer fullur tilhlökkunar í vinnuna. Röð tilviljananna gerði það að verkum að hann heillaðist af þeim fjölbreyttu og ófyrirséðu verkefnum sem blaðamennska þess tíma bauð upp á. Veisluhöld með Vigdísi, göngutúr með Karli Bretaprinsi sem nú er konungur og margt fleira dró hann inn í starfið sem hann sinnir enn. Hann hefur upplifað í návígi marga af stærstu atburðum Íslandssögunnar sem fréttamaður, samt eru það hvunndagshetjurnar og sögur fólks sem hafa oft snert hann mest. Hann nefnir dæmi þar sem hann fór hreinlega að gráta þegar lítið barn fékk gleraugu í fyrsta skipti. Eldri hjón vitjuðu heimili síns á nýjan leik sem hafði grafist undir ösku í Vestmannaeyjum. Mesta breytingin sem Kristján Már hefur upplifað á sínum ferli er þó veiking landsbyggðarinnar. Þegar hann hóf sinn feril sem blaðamaður var landsbyggðin sterk og öflug. Hann segir það hafa breyst til verri vegar og það finnst honum erfitt að horfa upp á. Kristján Már sem hefur lengi haft skammstöfunina KMU þegar kemur að fréttaskrifum segir söguna af gula vestinu sem er í dag hans einkennisbúningur. Sagan af sápugosinu í Geysi sem fór illa. Samgöngumál hafa alltaf verið honum ofarlega í huga. Hann telur getuleysi stjórnmálamanna skína í gegn þegar kemur að vegagerð. Síðustu jarðgöng sem grafin hafa verið hér á landi kláruðust fyrir fimm árum. Ljóst er að slík framkvæmd verður ekki á dagskrá fyrr en eftir fjögur til fimm ár. Hann segir að ef eigi að halda Íslandi almennilega í byggð þá þurfi stórátak í vegagerð. Kristján Már Unnarsson er í stuði í þessum þætti og öllum er hollt að hlusta á sögur og skoðanir KMU.