Stunda enn kynlíf eftir fimmtugt

Árelía Eydís Guðmundsdóttir
Árelía Eydís Guðmundsdóttir mbl.is/Styrmir Kári

„Það er soldið fyndið að lesa blöð sem ætluð eru fólki um og yfir fimmtugt. Fyrirsagnir eins og „stunda enn kynlíf“ og „það sem ekki má klæðast eftir þrítugt..“ „Hvernig á að halda vextinum og heilsunni.“ Ég get ekki annað en hlegið upphátt og hrist höfuðið. Þvílík tímaskekkja!,“ segir Árelía Eydís Guðmundsdóttir dósent við viðskiptadeild Háskóla Íslands í nýjasta pistli sínum. 

Hún segir að fólk um fimmtugt sé ákaflega öflugur markhópur, þetta sé fólkið sem fari fyrir fé og geti látið drauma sína rætast.

„Það er eins og markaðssérfræðingar hafi enn ekki áttað sig á að hópurinn sem nú fyllir fimmtugt er stærstur, ríkastur og öflugasti markaðshópurinn. Fólk um fimmtugt eyðir meira í tæki og tól, heilsudót og snyrtivörur, heimilisdót og annað heldur en yngri hópurinn. Fólk um fimmtugt lifir líka alveg jafnmiklu kynlífi (ef ekki meira því oftast eru ekki lítil börn að trufla, svo eru líka margir búnir að skipta út maka og komnir með rétta eintakið). Fólk um fimmtugt ferðast meira og lengra, fólk um sextugt er á fleiri námskeiðum en aðrir og fólk um sjötugt er á fullu í menningunni. Áttræðir einstaklingar í fullu fjöri eru líklegri til að skella sér í siglingu en þeir sem eru um þrítugt.“

Hún segir að úti í heimi sé eldra fólk meira áberandi í fjölmiðlum.

„Horfið á BBC og erlenda fréttaþætti og þið sjáið fréttahauka á öllum aldri. Lesið blöð (bæði pappír og netið) og þaulreyndir fréttamenn túlka heiminn. Blaðamenn, sem starfa hjá fréttamiðlum, hér á landi eru yfirleitt í yngra kantinum. Sú þróun hefur átt sér stað að undanförnu að fólk fer ekki að heiman fyrr en undir þrítugt. Þannig er barndómurinn eða ungdómurinn að lengjast og „fullorðins“ ár að lengjast í aðra áttina líka. Heilbrigt fólk verður ekki gamalt fyrr en eftir áttrætt og jafnvel lengur ef það hefur lifað heilbrigðu lífi og hefur góð gen. 

Ef einungis fulltrúar yngsta hópsins eru á fréttablöðum og í fjölmiðlum, eða á þingi þá erum við ekki að fá raunsanna mynd af því hvernig hjarta þjóðfélagsins slær.“

Árelía Eydís segir að við förum í gegnum seinna kynþroskaskeiðið á árunum 45-55 ára.

„Það er nefnilega þannig að á árunum 45-55 förum við í gegnum seinna kynþroskaskeið þar sem við lítum í eigin barm til að svara spurningunni: Hver er ég? Í stað þess sem við gerðum á fyrra kynþroskaskeiði en þar horfðum við á hópinn og spurðum svo: Hvernig get ég passað inn í hópinn?

Eins og eftir fyrra kynþroskaskeið þá fer allt af stað í hausnum og líkamanum á okkur. Það þarf ekki að fjalla sérstaklega um að fólk um fimmtugt megi ekki klæða sig í leðurbuxur, það hlustar hvort sem er ekkert á hvað það má eða má ekki gera! Þetta fólk gerir nákvæmlega það sem það langar til að gera!“

HÉR er hægt að lesa pistla Árelíu Eydísar.

Árelía Eydís Guðmundsdóttir
Árelía Eydís Guðmundsdóttir mbl.is/Styrmir Kári
mbl.is

Bloggað um fréttina