Myndi taka Rögnu með sem leynigest

Helga Vala Helgadóttir lögmaður er komin í framboð fyrir Samfylkinguna og skiptar 1. sæti fyrir Reykjavíkur norður. Í viðtali játar Helga Vala að hún myndi bjóða Rögnu Árnadóttur, aðstoðarforstjóra Landsvirkjunar, sem leynigesti í matarboð. Hún segir að stærsta áskorun haustsins sé að taka þátt í pólitíkinni í stað þess að vera að ybba sig uppi í sófa. 

Hvernig myndir þú lýsa sjálfri þér?

„Ég er hugrökk, hvatvís, glöð hamhleypa með á köflum of ríka réttlætiskennd. Get stundum verið aðeins of ósérhlífin en er að vinna í því.“

Hvað gefur vinnan þér

„Vinnan gefur mér orku og trú á að hvert einasta skref, hvert einasta handtak getur skipt máli. Hver manneskja sem leggur sig alla fram skiptir máli.

Ef þú mættir taka með þér leynigest í matarboð, hver yrði fyrir valinu?

„Rögnu Árnadóttur, aðstoðarforstjóra Landsvirkjunar, en hún er með skemmtilegri konum sem ég hef hitt. Ég tæki hana með hvert sem er.“

Ertu dugleg að láta drauma þína rætast?

„Jáh! Það er hluti af hvatvísinni að stökkva þegar tækifærin birtast.“

Hvað gerir þú þegar þú ert ekki í vinnunni?

„Faðma, elska, hjóla, fer í leikhús og tónleika, horfi á körfuboltaleiki, ferðast, geng á fjöll og bý til mat.“

Hvernig lífi lifir þú?

„Ég lifi frekar annasömu lífi, er stöðugt á ferð og flugi en það er gaman og þá er ég bara glöð.“

Hvað gerir þig hamingjusama?

„Fjölskyldan mín er klárlega það sem gerir mig hamingjusama. Ég er afskaplega rík kona að góðu fólki.“

Hefur þú átt það til að ofkeyra þig, og ef svo er, hvernig hefur þú brugðist við því?

„Já, auðvitað koma tímar þar sem maður er alveg búinn á því. Þá fer ég út og sæki mér súrefni, klæði mig í ull og sef vel.“

Hvað gerir þú til að vinda ofan af þér?

„Hreyfi mig. Það er besta vinda sem ég þekki.“

Uppáhaldsmatur?

„Allskonar grænmeti með dassi af lambakjöti eða fiski er það besta.“

Hvernig er morgunrútínan þín?

„Vakna klukkan 5.40 og mæti í lyftingar hjá Ingimundi Björgvinssyni í World Class úti á nesi. Það er líklega besta ákvörðun sem ég hef tekið undanfarin ár að æfa hjá honum. Svo fer ég heim, baða mig og faðma fólkið mitt, borða morgunmat og fer í vinnu.“

Hvernig skipuleggur þú daginn?

„Starf lögmanns er ansi óútreiknanlegt. Þú heldur kannski að dagurinn sé algjörlega niðurnjörvaður en svo fer allt upp í loft, stórmál dettur óvænt inn og þá verður að hliðra til. Þannig að, skipulagið er niðurnjörvað í dagatalið, mínúta fyrir mínútu en fer svo upp í loft á köflum.“

Hvernig leggst veturinn í þig?

„Veturinn leggst glimrandi vel í mig. Ný áskorun, skyndiákvörðun haustsins 2017 stendur yfir, en ég tók þá ákvörðun að hætta að ybba mig í sófanum heima og taka ábyrgð og leiða lista Samfylkingarinnar í Reykjavík. Ég hef verið þrælpólitísk allt mitt líf, en nú tók ég af skarið að bjóða fram krafta mína fyrir ákveðinn flokk og ákveðna stefnu og það er heldur betur ævintýri.“

mbl.is
Fleira áhugavert
Fleira áhugavert

Spurt og svarað

húðlæknir á Húðlæknastöðinni svarar spurningum lesenda

sálfræðingur á Sálfræðistofunni Sálarlíf svarar spurningum lesenda

einstaklings- og fjölskylduráðgjafi svarar spurningum lesenda

Klínískur félagsráðgjafi hjá Lausninni

hjúkrunar- og kynfræðingur svarar spurningum lesenda

svarar spurningum um lögfræðileg mál