Hegðun sem skilar árangri

Guðrún er menntuð í stjórnunarfræðum í Bandaríkjunum, Bretlandi og Barcelona en segist oft sækja stærstu lexíur í leiðtogafræðum og rekstri til ársleiðangurs síns um 14 Afríkuríki með 20 ungmennum frá Evrópu þegar hún var 19 ára.

Að leiða teymi til árangurs

Guðrún stendur fyrir vinnustofu um 7 venjur árangursríkra stjórnenda og kemur úr smiðju alþjóðlega þekkingarfyrirtækisins Franklin Covey. Námskeiðið verður í september í Háskólanum í Reykjavík. „Um er að ræða hagnýta og áhrifamikla nálgun sem færir þátttakendum viðhorf, færni og tæki til að leiða teymi til árangurs. Markmið vinnustofunnar er að aðstoða þátttakendur að takast á við þessa klassísku umbreytingu frá því að vera með besta einstaklingsframlagið, sem öflugir sérfræðingar, yfir í það að ná árangri í gegnum framlag annarra, sem áhrifamiklir stjórnendur.“

Hvernig fólk sjáið þið fyrir ykkur að hefði not af námskeiðinu?

„Allir þeir sem bera ábyrgð á að stjórna fólki, ferlum og fjármagni hafa gagn og gaman af vinnustofunni. Þeir sem vilja ná auknum árangri í lífi og starfi með því að stjórna betur sjálfum sér og leiða aðra til árangurs eiga erindi á 7 venjur árangursríkra stjórnenda. Verðandi og vaxandi leiðtogar á öllum stigum skipuritsins munu fá gagnlega innsýn í hvernig öflugir stjórnendur á þekkingaröld ná árangri.“

Ný viðhorf og aðferðir

Hvert er megininntak námskeiðsins og hvernig kennir þú?

„7 venjur árangursríkra stjórnenda byggjast á metsölubók Steven R. Covey, sem er enn mest selda bók um persónulega forystu í heiminum í dag. Vinnustofan samanstendur af samtölum, verkefnum, æfingum, leikjum, myndböndum, matstækjum og stuttum fyrirlestrum. Breytt hegðun byggist annars vegar á nýrri þekkingu og hins vegar á að þátttakendur tileinki sér ný viðhorf og aðferðir í vinnu. Þess vegna er vinnustofan hönnuð sem nokkurra mánaða ferli sem hefst og endar með 360° rafrænu mati, og þátttakendur vinna síðan saman sem „peer-coaches“ og styðja við hver annan með verkefnum í samtölum og snjallforriti (APP-i) eftir vinnustofuna.“

Hvað einkennir að þínu mati góðan stjórnanda?

„Ég tel að góðir stjórnendur þurfi að hafa grunnfærni (competence) og karakter til að leiða sjálfa sig og aðra til árangurs. Meðal mikilvæga færniþátta eru t.d. skipulag, stefnumörkun, að leiða breytingar, endurgjöf, samningatækni o.fl. Afgerandi karaktereinkenni öflugra leiðtoga eru t.d. eiginleikinn til að skapa traust, hvetja fólk, laða fram það besta í hverjum og einum, miðla framtíðarsýn, sýna virðingu t.d. með hlustun o.fl.“

7 venjur til árangurs er, að sögn Guðrúnar, mest selda bók sögunnar á sviði viðskipta, stjórnunar og persónulegs árangurs. „Á þeim 30 árum sem liðin eru frá því bókin kom fyrst út hefur hún selst í nærri 30 milljónum eintaka og verið þýdd á fleiri en 30 tungumál.“

Guðrún vann að endurþýðingu bókarinnar á íslensku fyrir nokkrum árum og fæst hún í bókabúðum og vefverslunum víða.

„Það sem heillaði mig við bókina er að boðskapurinn er í raun heilbrigð skynsemi,“ segir Guðrún en Covey byggði ritið á doktorsrannsóknum sínum við Harvard-háskóla. „Hann vildi svara þeirri spurningu hvers vegna sumir einstaklingar og vinnustaðir virðast ná meiri árangri en aðrir. Til þess skoðaði hann og greindi fjölda rannsókna, ævisagna, greina og ljóða, og kom þar auga á ákveðin þemu.“

Þessi þemu má einfalda sem sjö venjur: „Sú fyrsta er að taka af skarið – að vera virkur og taka ábyrgð ef maður vill ná árangri. Venja númer tvö er að skoða endinn í upphafi: vita að hverju er stefnt áður en lagt er af stað. Þriðja venjan er síðan að forgangsraða og kunna að segja nei: gera það mikilvægasta fyrst en láta hitt mæta afgangi,“ útskýrir Guðrún.

„Fjórða venjan er að temja sér að í öllum viðskiptum og samningum hafi allir hagaðilar ávinning af, og sú fimmta að nýta ávallt skilningsríka hlustun. Sjötta venjan er að staðnæmast ekki heldur finna stöðugt nýjar leiðir til vaxtar og nýsköpunar, og loks er sjöunda venjan að endurnýja sjálfan sig og endurnæra huga og líkama reglulega.“

Boðskapur sem á alls staðar við

Hverju hefur það breytt fyrir þig að tileinka þér efni námskeiðsins?

„Um er að ræða afar einfaldan en mjög áhrifamikinn ramma um hegðun sem skilar árangri. Ég hef unnið með þetta efni með stjórnendateymum í tugum landa í flestum heimsálfum, í einkarekstri og opinberum, í alþjóðlegum stórfyrirtækjum og ungum frumkvöðlafyrirtækjum. Alls staðar á þessi nálgun jafn vel við. Það minnir mig stöðugt á að þó að heimurinn sé flókinn og fólk ólíkt, þá eru grunnþættir sem skila árangri í lífi og starfi afar svipaðir þvert á landamæri, trú, atvinnugreinar, aldur og kyn.“

Hvað skiptir þig mestu máli í lífinu?

„Að njóta líðandi stundar í faðmi fjölskyldu og góðra vina, að læra stöðugt og miðla, og auðga okkar heim með gleði, virðingu og þakklæti.“