Stórgóður undirbúningur fyrir lífið

Guðrún Sigurgeirsdóttir.
Guðrún Sigurgeirsdóttir. mbl.is/Eggert Jóhannesson

Guðrún Sigurgeirsdóttir segir útskrifaða nemendur oft hafa á orði að tíminn hjá Hússtjórnarskólanum í Reykjavík hafi verið eitt besta tímabil lífs þeirra. 

Hússtjórnarskólinn í Reykjavík lifir enn góðu lífi og gaman að sjá hvernig þessi rótgróna menntastofnun nær að halda í hefðirnar en um leið aðlaga námið síbreytilegu samfélagi. Eins og margir lesendur þekkja nær saga Hússtjórnarskólans allt aftur til ársins 1942 og hét hann Húsmæðraskóli Reykjavíkur allt fram til ársins 1975 þegar nafninu var breytt í takt við nýja tíma. Námið spannaði áður tvö ár en í dag aðeins eina önn og leggja nemendur stund á fög tengd heimilshaldi, matreiðslu og textílgreinum. Kennslan fylgir námskrá framhaldsskóla og er námið metið til eininga á framhaldsskólastigi.

„Flestir nemendur eru þegar búnir að ljúka stúdentsprófi, en þeir sem yngri eru nota oft tækifærið og láta námið hér ganga upp í valgreinakvótann,“ segir Guðrún Sigurgeirsdóttir, matreiðslukennari hjá Hússtjórnarskólanum.

Heimavist og fullt fæði

Meðal námsgreina má nefna matreiðslu, næringarfræði, vörufræði, þvott og ræstingu að ónefndum textílgreinum eins og útsaumi, fatasaumi, prjóni, hekli og vefnaði. „Nemendur læra heilmikið á önninni og öðlast stórgóðan undirbúning fyrir lífið, skapa, bæta og fegra í kringum sig,“ segir Guðrún og bendir á að vaxandi áhugi á nýtni og endurvinnslu geri námið enn áhugaverðra í augum unga fólksins.

Nemendahópurinn í hverjum árgangi er ekki stór, en mjög vel um þá hugsað. Skóladagurinn er frá kl. 8 til 5 og geta þeir sem þess óska búið á heimavist í skólabyggingunni við Sólvallagötu. „Ég mæli eindregið með því að fólk nýti sér heimavistina. Er mjög góður andi í húsinu og myndast þar vináttubönd sem endast fólki ævina á enda,“ segir Guðrún. Pláss er fyrir 24 nemendur á hverri önn og 15 pláss á heimavistinni.

Borga þarf 430.000 kr fyrir námið og er heimavistargjald 65.000 kr. fyrir önnina. Innifalið er fullt fæði alla önnina, allt námsefni og hráefni fyrir bæði hannyrðagreinar og matreiðslugreinar. Nemendur fá því heilmikið fyrir peninginn.

Rammíslenskt og alþjóðlegt

Það er staðreynd að margt ungt fólk heldur af stað út í lífið með litla þekkingu á flestu því sem snertir daglegt heimilishald. Þau hafa ekki fengið tækifæri til að læra að matbúa eða skipuleggja matarinnkaupin, og hvað þá heldur átt þess kost að spreyta sig á gömlu matarhefðunum eins og að taka slátur, steikja kleinur og laufabrauð. „Við gerum hefðbundinni íslenskri matreiðslu skil og lögum kjötsúpu, steikjum fisk í raspi, bökum hnallþórur og margt fleira. Nemendur læra líka að elda í takt við tíðarandann og spreyta sig t.d. á ítalskri eða austurlenskri matargerð, eða hverju því sem þau hafa áhuga á.“

Guðrún segir það koma mörgum nemendanna skemmtilega óvart að uppgötva hvað þeir geta gert í eldhúsinu, með smá leiðsögn. „Það er vitaskuld einstaklingsbundið hvað nemendurnir hafa góðan grunn þegar þau koma til okkar, og reynum við að haga náminu þannig að allir hafi gagn og gaman af og læri eitthvað nýtt.“

Það er heldur betur gott veganesti fyrir ungt fólk sem er að byrja að standa á eigin fótum að kunna að elda góðan mat og kaupa skynsamlega inn. Guðrún segir það aldeilis hjálpa til við að halda reglu á útgjöldum heimilisins og stuðli vitaskuld að heilsusamlegra mataræði. „Námið felur m.a. í sér að nemendur læra að nýta afganga og nota það sem er til hverju sinni, og aðlaga matseldina eins og þarf til að fyrirbyggja matarsóun.“

Listrænar undirstöður

Textílnámið nýtist líka vel og fá stúlkurnar að spreyta sig á að sauma á sig kjól á meðan piltarnir sauma sér jakkaföt. Guðrún segir gagnlegt að kunna að prjóna og sauma en textílnámið hafi líka leitt fólk út á nýjar brautir og kveikt neista sem hafi orðið að stóru báli: „Ég veit dæmi þess að nemendur frá okkur hafa fengið forgang inn í frekara lista- og textílnám bæði hérlendis og erlendis eftir að hafa lært undirstöðurnar hér í Hússtjórnarskólanum.“

Í gegnum árin hefur aðsóknin í nám Hússtjórnarskólans verið svo góð að ekki hefur verið þörf á að auglýsa eftir nemendum, og eflaust hjálpar þar til hvað orðspor skólans er gott og hve vel gamlir nemendur láta af dvölinni þar. „Við höldum opið hús tvisvar á ári í lok annar í desember og maí. Algengt er að útskriftarnemendur noti tækifærið til að hittast þar og rifja upp gamla tíma. Er það ekki skrítið enda margir sem hafa á orði að misserið við Hússtjórnarskólann hafi verið einn besti tíminn í lífi þeirra.“

Nánar um málið
í Morgunblaðinu
Áskrifendur:
Nánar um málið
í Morgunblaðinu
Áskrifendur:
Kauptu vikupassa

Lestu meira með vikupassa!

Fáðu þér vikupassa fyrir 1.890 kr. og þú færð aðgang að öllu efni úr blaði dagsins í dag og næstu 6 daga.

Kaupa vikupassa

Aðrar áskriftarleiðir »