Smartland Mörtu Maríu | mbl | 9.10.2025 | 22:00

13,4% af ríkustu einstaklingum heims eru konur

Rafaela Aponte Diamant, Francoise Bettencourt Meyers og Alice Walton. Samsett mynd/Youtube

Árlega birtir tímaritið Forbes lista yfir ríkustu einstaklinga í heimi. Af 3.028 milljarðamæringum sem komast á lista Forbes eru 13,4% þeirra konur, samkvæmt tölum þessa árs.

Það kemur eflaust ekki mörgum á óvart að efsti maður á lista yfir ríkustu einstaklinga heims sé Elon Musk, starfandi forstjóri Teslu. Auk Teslu hefur Musk tekið þátt í stofnun sex annarra fyrirtækja, t.d. eldflaugaframleiðandans SpaceX og xAI, fyrirtæki sem sérhæfir sig í gervigreind. Auðæfi kappans eru metin á 485 milljarða dali eða um 60 þúsund milljarða króna, samkvæmt lista Forbes.

Í öðru sæti er vitaskuld Mark Zuckerberg sem markaði upphafið að samfélagsmiðlasýki fólks um heim allan. Zuckerberg var aðeins 19 ára þegar hann stofnaði Facebook 2004, í þeim tilgangi að auðvelda samnemendum sínum við Phillips Exeter Academy að tengja nöfn við andlit. Facebook, nefnist Meta frá 2021, fór á markað 2012 og í dag á hann 13% hlut í fyrirtækinu.

Elon Musk glottir á fréttaráðstefnu í Hvíta húsinu í Washington í maí. Allison ROBBERT / AFP

Alice Walton er erfingi Walmart-keðjunnar. Hún situr ekki í stjórn líkt og bræður hennar en hefur einbeitt sér að góðgerðarstarfsemi og listum. Hún opnaði Crystal Bridges-safnið í Bentonville, Arkansas, árið 2011, þar sem eru verk eftir t.d. Andy Warhol, Norman Rockwell og Mark Rothko. Skjáskot/Youtube

Það þarf aðeins að skrolla niður listann til að finna fyrstu konuna – sem situr í 15. sæti – en það er Alice Walton, dóttir stofnanda Walmart og einn af erfingjum keðjunnar. Hún hefur heldur kosið að halda sig við góðgerðarstarfsemi fremur en að sitja í stjórn Walmart líkt og bræður hennar, Rob og Jim, sem eru örfáum sætum fyrir ofan hana á listanum, í því 11. og 12.

Næsta kona á listanum, í 21. sæti, er Francoise Bettencourt Meyers og fjölskylda hennar. Bettencourt er erfingi franska snyrtivöruveldisins L'Oréal. Fyrirtækið var stofnað árið 1909 af afa hennar, efnafræðingnum Eugène Schueller, sem fann upp háralit svo konurnar í París gætu náð fram hlýjum, gulum tónum í hárið sem voru svo vinsælir á þessum tíma, án þess að skemma húð eða hár.

Francoise Bettencourt Meyers var um tíma ríkasta kona heims. Skjáskot/Youtube

Frumkvöðullinn og forstjóri Meta, Mark Zuckerberg er hann mætti til kvöldverðar fyrir stjórnendur í tæknigeiranum sem haldinn var á vegum Donald Trump Bandaríkjaforseta í Hvíta húsinu í september. SAUL LOEB / AFP

Frétt af mbl.is

Þarf ég lim til að vera lunkin í fjármálum?

Ríkasta konan sem byrjaði með tvær hendur tómar

Það vekur athygli að allar konurnar, nema ein, í efstu hundrað sætunum á lista Forbes eru erfingjar viðskiptaveldis, en ekki af því þær stofnuðu eitthvað sjálfar. Sú eina „sem byrjaði með tvær hendur tómar“ er Rafaela Aponte Diamant og situr hún í 44. sæti á listanum. Auðæfi hennar eru metin á 37,5 milljarða dali eða um 4.500 milljarða króna.

Diamant er ísraelsk-ítalskur viðskiptajöfur og á helmingshlut í stærsta skipafyrirtæki heims, Mediterranean Shipping Company (MSC), ásamt eiginmanni sínum, Gianluigi Aponte. Diamant er áttræð og fædd í borginni Haifa í Ísrael en fluttist með fjölskyldu sinni til Sviss þegar hún var barn því faðir hennar var í stjórnandastöðu í banka í Genf.

Í júlí 2023 birtist grein á Forbes um Diamant með fyrirsögninni: „Ríkasta kona heims, sem byrjaði með tvær hendur tómar.“ Diamant kynntist eiginmanni sínum á sjöunda áratugnum þegar hún var farþegi á skipi sem hann stýrði við eyjuna Capri á Ítalíu. Hjónin fóru saman í skipabransann árið 1970 þegar þau keyptu skip fyrir lán upp á 200.000 dali. Smám saman stækkuðu þau flotann og árið 1988 tóku þau yfir Monterey og færðu út kvíarnar í skemmtisiglingar.

Rafaela Aponte Diamant ásamt eiginmanni sínum og viðskiptafélaga, Gianluigi Aponte. Skjáskot/Youtube

Í fyrstu 30 sætunum á lista Forbes eru 19 auðkýfingar frá Bandaríkjunum, 12 koma úr tæknigeiranum og koma allir frá Bandaríkjunum fyrir utan þrjá; Carlos Slim Helú frá Mexíkó, eiganda stærsta farsímafyrirtækis í Ameríku, hinn kínverska Zhang Yiming, stofnanda tæknifyrirtækisins ByteDance sem er þekkt fyrir samfélagsmiðilinn TikTok, og Zhong Shanshan, einnig frá Kína, stofnanda og stjórnarmann Nongfu Spring, sem framleiðir vatn á flöskum.

Eins og sagði í byrjun er 13,4% einstaklinga á lista Forbes konur. Hlutfallið fer upp frá 13,3% í fyrra og 12,8% árið 2023. Það er ágætis spurning hvort fleiri konur væru ofar á listanum ef auðæfin væru metin í merkjavöru?