Mary J. Blige segir eiginmanninn, Martin Kendu Isaacs, vera sendingu af himnum ofan. Söngstjarnan hefur háð erfiða glímu við þunglyndi og barist gegn áfengis- og eiturlyfjafíkn og fullyrðir að guð hafi sent henni Isaacs til að bjarga lífi hennar.
Blige var gestur í breska sjónvarpsþættinum Daybreak og talaði þar opinskátt um tónlistarferilinn, þunglyndið og fíkniefnin.
Söngkonan var spurð hvað hefði komið í veg fyrir að hún endaði eins og söngstjörnurnar Amy Winehouse og Whitney Houston, sem báðar létust sem kunnugt er af völdum fíkniefnaneyslu. Þakkaði Blige trúnni og eiginmanninum, sem áður var í hlutverki umboðsmanns hennar.
„Mér leið svo illa að ég hélt að ég væri að deyja,“ sagði Blige í bresku sjónvarpi. „Ég vissi að ég yrði að snúa við blaðinu. Svo ég lagðist á bæn og bað guð um að senda mér einhvern sem gæti bjargað mér. Hann sendi mér eiginmanninn, minn besta vin.“