Fólk leggur oftar en ekki ofuráherslu á að mæta í ræktina þegar það talar um að grenna sig. Spinning tímar og lyftingar koma þó ekki í veg fyrir að fólk fitni enda annað sem skiptir meira máli. Mataræði er lykillinn að holdafari fólks þótt hreyfing spili inn í.
Þeir sem vilja grenna sig en sleppa því að fara í ræktina geta því vel gert það. Brot úr sögum af Women's Health geta gefið fólki hugmynd um hvernig er hægt að fara að.
Svefn
Ein kona missti níu kíló eftir að hún fór að huga betur að andlegu hliðinni og stór þáttur í því var að koma reglu á svefninn. Sérfræðingur segir að það að sofa að minnsta kosti sjö tíma á nóttu skiptir jafn miklu máli á kaloríurnar. Ófullnægjandi svefn getur komið af stað hormónabreytingum með tilheyrandi þyngdaraukningu og meiri svengd.
Engin kolvetni
Önnur kona tók öll kolvetni út úr mataræði sínu á ketó-kúrnum. Hún borðaði því aðallega fitu og prótín og missti 20 kíló á einu ári. Hún segist ekki æfa en reynir að vera virk yfir daginn.
Telja hitaeiningar
Eftir að hafa gefist upp á einkaþjálfara prófaði kona ein smáforritið vinsæla MyFitnessPal, þar gat hún fylgst með hversu margar hitaeiningar hún innbyrti og missti 18 kíló á einu og hálfu ári. Það er góð regla að ef fólk vill grennast að borða færri hitaeiningar á dag en það brennir.
Hreint mataræði
Enn önnur kona missti sjö kíló á fimm vikum með því að sneiða framhjá unnum matvörum. Hún borðaði hreina fæðu, prótín, gróft brauð, ávexti og grænmeti. Hún leyfði sér þó að borða 100 til 200 hitaeiningar á dag af sætindum.
Þrátt fyrir að það sé hægt að grennast án þess að fara í ræktina ættu allir að hreyfa sig. Hreyfing getur verið mismunandi og oft minnkar löngun í sætindi og sveittan mat eftir góða hreyfingu.
Svo er hægt að gera fleira en að fara bara á hlaupabrettið. Guðrún Kristín Huldudóttir sagði Smartlandi frá því hvernig hún grenntist eftir að hún byrjaði að fara í göngutúra og fjallgöngur.