Reyndu í fimm ár áður en barnið kom

Leikkonan Hilarie Burton og eiginmaður hennar, leikarinn Jeffrey Dean Morgan, eignuðust dóttur um miðjan febrúar. Ólíkt mörgum verðandi mæðrum fyllti Burton ekki Instagram af óléttumyndum og myndum af nýfæddu barninu. Ástæðan var sú að hún vildi ekki valda öðrum konum sársauka. 

Leikarahjónin eiga fyrir dreng sem fæddist árið 2010, rúmu ári eftir að þau kynntust. Það tók þau hins vegar mun lengri tíma að eignast sitt annað barn. Burton segir að það hafi tekið þau fimm ár að eignast yngra barnið. 

Burton sem er 35 ára varð fyrst ólétt aftur eftir að hafa reynt í eitt og hálft ár. Hún segir að þau hafi verið mjög glöð, valið nöfn og svo framvegis en svo hafi hún misst fóstrið. „Fleiri missar fylgdu og eins og svo mörg pör vita, það var sorglegt. Það er enn sorglegt,“ skrifaði Burton. 

Á meðan þau voru að reyna segir Burton að hún hafi oft opnað tölvuna á eldhúsborðinu og séð fréttir af óléttum og fæðingum barna. „Ég grét af öfundsýki yfir því hversu auðvelt þetta var fyrir þau. Vissu þau ekki að eitthvað gæti komið upp á? Vissu þau ekki að það væru konur þarna úti sem ættu í erfiðleikum?“

Hún segist ekki vilja að fæðing dóttur hennar verði ástæða til þess að fleiri konur gráti við eldhúsborðið. „Ef eitthvað er þá óska ég þess að hún skilji eftir von fyrir aðra. Frjósemi er hverflyndur hlutur.“

• Blogga um frétt