Ketó sagt hafa neikvæð áhrif á kynlífið

Ketó-mataræðið hefur verið afar vinsælt að undaförnu og virðist annar hver maður vera að borða mikið af góðri fitu og lítið af kolvetnum. Ekki eru allir sammála um ágæti mataræðisins sem var í fyrstu notað sem meðferðarúrræði fyrir flogaveika. 

Independent ræddi við næringarfræðinga sem efast um ágæti mataræðisins þegar kemur að kynlífi. Á meðan sumir vilja meina að mataræðið bæti kynhvötina færðu næringarfræðingarnir rök fyrir allt öðru. 

Næringarfræðingurinn Lily Soutter segir aukaverkanir þess að vera á ketó-mataræðinu geta verið breytingar á hormónunum. „Sumar rannsóknir benda til þess að lágkolvetnamataræði minnki skjaldkirtilsvirkni, sem leiðir ekki bara til þreytu og skapvonsku heldur getur líka haft neikvæð áhrif á kynhvötina,“ sagði Soutter. 

Annar næringarfræðingur, Marlyn Glenville, bendir ekki bara á staðreyndina um hormónabreytinguna heldur líka áhrif þess að minnka kolvetnin jafnmikið og einstaklingur gerir þegar hann byrjar á ketó-mataræðinu. „Kolvetni er matur sem vanalega gefur okkur orku, svo fyrst þegar einhver byrjar á slíku mataræðinu getur hann fundið fyrir þreytu,“ sagði Glenville. „Það gætu líka verið höfuðverkir og flensutilfinning. Svo á þeim tímapunkti getur kynhvötin verið ansi lág vegna þess að manneskjunni líður ekki vel.“

Hvaða áhrif hafa þá hamborgari og franskar? mbl.is/Thinkstockphotos

• Blogga um frétt